Малларын-салларын хомунан, Сатыылаан, көлөнөн сыннаран, Арҕаалыыр аартыкка холбоһон, Туттулар сор суолун бу бар дьон.
Үөһэттэн бирикээс кэлбитин Ааҕаатын тиэтэтэ бардылар, Бу сурах дьиҥнээҕин тиэрдээтин, Үс күнү хомуурга быстылар.
Ол сурук хас тыла, кэпсээнэ Оройуон дьоннорун соһутта, Дойдуттан арахсыы иэдээнэ, Киһини барытын уолутта.
Бу ханна дьэ, тиийэн-түгэнэн, Олоруох муҥнара тирээтэ? Кимнэрэ-туохтара көмүскээн Сирдиэҕэй байылыат сирдэргэ?..
Бастакы күннэртэн саҕалаан, Аччыктыыр эрэйин биллилэр, Оҕолор ытаһан-кыҥкыйдаан, Ийэлэр иэдээҥҥэ түстүлэр.
Эр дьоннор тулуйа сатааннар, Малларын көрбүтэ буолаллар, Инники суолларын санааннар, Сүр ыардык өрүтэ тыыналлар.
Уһуннук айаннаан сылайан, Бүгүн бу Бэстээххэ тиийдилэр, Мустаннар, хомуллан айманан, Борохуот кэлэрин күүтэллэр.
Күһүннү халлааммыт хахсаата Эрийэр, мускуйар, буруйар, Илдьиркэй танас-сап туомата Ититиэн кэриэтин тырыттар.
Тоҕо бу борохуот аал кэлбэт, Ама дуу, умнубут үһүлэр, Киммит да аһыныа биллибэт Кыһаллан бар-дьоммут иннигэр.
Дойдуттан ыраата иликтэн Аччыктаан, ыарыыттан, силбиктэн Дьонноро өлөрүн көрдүлэр, Бастакы киһини көмтүлэр.
Бу маннык айаннаан сордонон, Хаһан дуу, ханна дуу тиксэллэр? Хастара, кимнэрэ чордонон, Төрөөбүт буоругар эргиллэр?..
Николай Пахомов