Чурапчы улууһугар ыам ыйын 27 күнүттэн Дьиэ кэргэҥҥэ элбэх өҥөнү оҥорор кииҥҥэ инбэлиит оҕолоох ыалларга анаан «Передышка” бөлөх аһыллан үлэлиир.
Бу өрөспүүбүлүкэтээҕи пилотнай бырайыагы Дьокуускайга, Намҥа уонна Чурапчыга үлэҕэ киллэрдилэр. Манна уһуйааҥҥа сылдьыбат оҕолор хабыллаллар. Кинилэри сарсыарда 10 чаастан киэһэ 4 чааска диэри анал үөрэхтээх исписэлиистэр көрөллөр-истэллэр, дьарыктыыллар. Бырайыак сүрүн сыалынан төрөппүттэр эбии дохуоттаналларыгар кыаҕы биэрии уонна дьиэ кэргэн уйгутун тупсарыы буолар.
Нарыйа Сибирякова, баспытаатал:
Бөлөхпүт аһыллыаҕыттан үс заезд буолла, уопсайа 13 оҕо сырытта. Биир заезд 15 үлэ күнүн устата буолар. Биһиэхэ улуустааҕы социальнай харалта нарпавлениетынан 14 саастарыгар диэри оҕолор кэлэллэр. Ол иһин төлөбүрэ суох, босхо сылдьаллар. Күнүскү буолан, оҕолор үстэ аһыыллар. Оҕолору кытта логопед, психолог дьарыктанар уонна адаптивнай физкултуура кабинета үлэлиир. Оттон биһиги баспытаатталлар күннээҕи олох үөрүйэхтэригэр уһуйабыт. Оҕолор да, төрөппүттэр да сөбүлээтилэр. Бастакы заезка сылдьыбыттар, күһүн эмиэ суруттарыахпыт диэн барбыттара. Бөлөхпүт сылы эргиччи үлэлиир.
Сахаайа Сивцева, төрөппүт:
Оҕом «Передышкаҕа» сөбүлээн сылдьар. Кини быйыл түөрт сааһын туолар. Атын оҕолору кытта алтыһарын ыарырхатар этэ. Бу бөлөххө сылдьан, аҕыйах кэм иһигэр тупсуу, эбиллии баарын бэлиэтиибин. Оҕолору кытта оонньуур уонна социализация ааһан, кэпсэтэ сатыыр буолла. Бастаан кэлэрбитигэр симик соҕустук киирэрэ, билигин туох, ханна баарын билэн, массыынаттан түһээт да, «манна бардыбыт” диэн ыҥырар уонна холкутук хаалар. Доруобуйанан хааччахтаах оҕолоох буоллахха, бастайааннай үлэҕэ үлэлиир, биллэн турар, уустуктардаах. Ол иһин былырыын социальнай хантыраагынан туһанан бэйэ дьыалатын арыммытым. «Курочка Ряба” дьиэ аһын доставкатын үлэлэтэбин. Онон оҕом манна сылдьар кэмигэр сакааска күүскэ үлэлии сылдьабыт. «Передышка» бөлөх үлэһиттэригэр махтанабыт, оҕом сөбүлээн, өссө сылдьар былааннаахпыт.
Марфа Петрова.