Чурапчы улууһугар «Ыал саргыта” бырайыак чэрчитинэн тэриллибит уруу күнүгэр үс саҥа ыал сүрэхтэннэ. Ол курдук, Ирина уонна Семен Сивцевтар, Варвара уонна Анатолий Барашковтар, Александра уонна Семен Дьячковскайдар эр-ойох буолуу туоһу суругун туттуллар.
Маны сэргэ үөрүүлээх – быһыыга майгыга ыал буолан, 50 сыл бииргэ олорбут Кыһыл көмүс сыбаайбаларын бэлиэтээбит Мария уонна Василий Пудовтар, Дария уонна Григорий Макаровтар, Анисия уонна Алексей Алексеевтар Чурапчы улууһун «Ытык олох” бочуот кинигэтигэр киирдилэр. Бу улууспут ытык ыаллара 1975 сыллаахха олорор нэһилиэктэрин сельбюро ЗАГС-гар сокуонунан эр-ойох буолуу докумуонугар илии баттаабыттар. Ону кэрэһэлиир докумуон Чурапчы улууһун ЗАГС-тын архыыбын кинигэтэ туоһулуур.
Алексей Алексеев, Хоптоҕо нэһилиэгин бочуоттаах олохтооҕо:
— Анисиялыын ахсынньы 22 күнүгэр Хоптоҕо нэһилиэгэр ыал буолбуппут. Биһиги Хоптоҕобутуттан ханна да, харыс да сири халбарыйбакка бэйэ бэйэбитин өйдөһөн, баччааҥҥа диэри эллэһэн-эйэлэһэн, өйөнсөн кэллибит. Икки кыыс оҕолоохпут, 7 сиэннээхпит, 2 хос сиэннээхпит. Кэргэним биэнсийэҕэ тахсыар диэри фармацияҕа сэбиэдиссэйинэн, мин военруктан саҕалаан, кэнники хачыгаарга тиийэ үлэлээтибит. Эдэр ыалларга эйэлээх буолуҥ, кыыһырсымаҥ, оҕолоргутун тапталынан иитиҥ диэн баҕа санаабытын этэбит.
Дьоро күнүнэн улуус баһылыгын социальнай боппуруостарга солбуйааччы Мария Кронникова саҥа ыаллары эҕэрдэлээн туран, улуус дьаһалтатын 10 тыһ. суумалаах сэртипикээтин туттарда.
Анастасия Афанасьева, СӨ Бырабыыталастыбатын ЗАГС-ҕа управлениетын Чурапчытааҕы салаатын салайааччыта:
— Бүгүн үс бүк үөрүүлээх күн тосхойдо. Бастатан туран, үс көлүөнэнэн уруу буолла. Ол курдук, эдэр, орто уонна аҕам саастаах дьоммут эр-ойох буолуу докумуонугар илии баттаан, Чурапчы улууһугар эбии үс ыал төрүттэннэ. Маны таһынан улууспут ытык ыалларын, Кыһыл көмүс сыбаайбалаах дьоммутун «Ытык олох” бочуот кинигэтигэр киллэрдибит. Бу барыта ЗАГС-быт саҥа саалатын үөрүүлээх аһыллыытыгар буолла. Онон мантан ыла Чурапчы улууһун ЗАГС-тын отдела саҥа сылы саҥа саалаҕа көрсөр буоллубут. Бу үөрүүбүтүгэр биһиги Чурапчы улууһун дьаһалтатыгар махтанабыт. Дьаһалта 100 тыһ. үбү көрөн, саала саҥардыллан, тупсаҕай гына өрөмүөннэннэ. Маны сэргэ СӨ Бырабыыталыстыбатын иһинэн Гражданскай турук акталарын суруйар салалта саалабытыгар саҥа миэбэллэри бэлэхтээтэ.
Улууспут бары дьиэ кэргэттэригэр үйэлээх тапталы, бигэ туруктаах олоҕу баҕарабыт.
Марфа Петрова. Наталья Сибирякова видеота.