Бу соторутааҕы Чурапчы нэһилиэгэр Александр Федотов аатынан успуорт уораҕайыгар улууска “Ыал саргыта” бырагыраамма иитинэн, быйыл иккис төгүлүн “Үлэҕэ уонна оборуонаҕа бэлэммин” физкултуурунай-ыспартыыбынай бэлэмнээх буолууга улуус дьиэ кэргэттэрин икки ардыларыгар күрэхтэһии буолан түмүктэннэ.
Тэрээһин үөрүүлээх чааһыгар “Чурапчы улууһа” МО баһылыгын социальнай боппуруостарга солбуйааччы Мария Кронникова, улуус дьаһалтатын успуорка управлениетын начаалынньыга Дьулустан Егоров, Вячеслав Карпов аатынан оҕону уонна ыччаты успуорка уһуйар оскуола дириэктэрин солбуйааччы Семен Артемьев эҕэрдэлээтилэр.
Чурапчы, Чакыр, Одьулуун, Сылаҥ нэһилиэктэриттэн 5 дьиэ кэргэн кыттыыны ылла.
Кинилэр манна бириэмэҕэ: 30 миэтэрэҕэ сүүрүү, имигэс буолууга иннигэр түһүү тургутук, турникка тардыныы, муостаттан анньыныы, 16 киилэ ыйааһыннаах гиирэни өрө анньыы, сытан эрэ тардыныы, 30 миэтэрэҕэ төттөрү-таарыы сүүрүү, салгын саанан ырааҕы ытыы, миэстэттэн уһуну ыстаныы, ис былчыҥын хачайдааһын нуормаларын толордулар.
Уопсай түмүккэ, биир оҕолоох дьиэ кэргэттэргэ
1 миэстэ – Чурапчы нэһилиэгиттэн Василий, Лилия, Ирина Степановтар, 30000 солк;
2 миэстэ – Чурапчы нэһилиэгиттэн Егор, Надлежда, Лилия Аммосовтар, 20000 солк;
3 миэстэ – Сылаҥ нэһилиэгиттэн Василий, Александра, Алеся Ивановтар, 10000 солк.
Элбэх оҕолоох дьиэ кэргэттэргэ
1 миэстэ – Чакыр нэһилиэгиттэн Станислав, Майя, Амина, Эвелина, Адам Адамовтар, 30000 солк;
2 миэстэ – Одьулуун нэһилиэгиттэн Петр, Анжелика, Амина, Арылхан, Харысхан Жегусовтар, 20000 солк.
“Биһиги иккиэн Семен Яковлев-Эрилик Эристиин аатынан Чакыр орто оскуолатыгар учууталлыыбыт. Бастакы кыттааһыммыт буолар, көрүҥнэринэн этэр эбит буоллахха бары көрүҥнэри кыһыл көмүс мэтээлгэ туттардыбыт эрээри салгын санаан ытыыбытыгар кыратык ыарырҕаттыбыт. Успуордунан дьарыктанабыт, уолбут Белогорскай куоракка тустан бэҕэһээ саҥа кэлбитэ, 22 киилэҕэ диэри ыйааһыннаахтарга үрүҥ көмүс мэтээллээх, кыра кыыспыт үҥкүүһүт, улахан кыыспыт сүүрүүгэ ааспыт сырыыга Илин эҥэргэ 5 миэстэ буолбута эмиэ үҥкүүгэ сылдьар, Кытайга тиийэн кыттан кэлбиттэрэ. Маннык күрэхтэһии ыытыллара олус үчүгэй, инникитин да элбэх дьиэ кэргэн кэлэн кыттара эбитэ буоллар. Чөл олоҕу тутуһуохтарын, төһө кыалларынан успуордунан элбэхтик дьарыктаныахтарын наада”, — диэн кыайыылаах Адамовтар дьиэ кэргэн санаалын үллэһиннилэр, баҕа санааларын эттилэр.
Сэмэн ЖЕНДРИНСКЭЙ. Ааптар хаартыскаҕа түһэриитэ