Аҕа дойду Улуу сэриитигэр Хатылы нэһилиэгиттэн 136 киһи ыҥырыллан, кыргыһыы толоонугар 69 буойун дьоруойдуу охтубута. Төрөөбүт дойдуларыгар 67 киһи эргиллэн кэлбитэ.
Бу уоттаах сэриигэ Бабаҕа үрэх бастыҥ ыччаттара, «Кыһыл ыллык” колхуос туруу үлэһит 10 ини-бии Баиннар уонна икки күтүөттэрэ эмиэ ыҥырыллыбыттара. Кинилэр үтүө, хорсун ааттарын үйэтитэн, Улуу Кыайыы 80 сылынан Хатылы орто оскуолата “Баиннар албан суолларынан” сатыы хамыы акциятын тэрийдилэр.
Ол курдук, 9-с, 10-с, 11-с кылаас уолаттара ини-бии Баиннар олорон ааспыт Бабаҕаларыгар тиийэн, Улуу Кыайыы 20 сылынан оҥоһуллубут өйдөбүнньүк бэлиэни сөргүттүлэр. Бөлөҕү Иван Федосеев салайан илдьэ сырытта. Бу күн анаабыт курдук сылаас, күннээх халлаан турда.
Даҕатан эттэххэ, бу өйдөбүнньүгү 1965 сыллаахха Баиннар аймахтара түмсэн туруорбуттар. Аҕа дойду сэриититтэн Еремей Дмитриевич 1944 сыллаахха ыараханнык бааһыран дойдутугар кэлэн, сырдык тыына быстыбыт. Семен Алексеевич «Кыһыл ыллык”, “Кыһыл партизан” колхуостарга үлэлээбит. Иван Алексеевич Листиков 1945 сыллаахха кэлбит. Күтүөттэрэ Гаврил Дмитриевич Давыдов 1945 с. улаханнык бааһыран, дойдутун булбут.
Оҕолор айаҥҥа турунуохтарын иннинэ, кинилэри нэһилиэк бэтэрээннэрин түмсүүтэ сылаас алаадьынан күндүлээтэ.
Бэлиэ дьаһал саҕаламмытынан Хатылы орто оскуолатын дириэктэрэ Екатерина Егорова эҕэрдэ тылы эттэ. Тус этиитигэр: «Биһиги эйэ иһин олохторун толук уурбут саллааттар сырдык ааттарын, сэрии бэтэрээннэрин үйэтитэр ытык иэстээхпит. Биир дойдулаахтарбытыгар, ини-бии Баиннарга сүгүрүйэн, Анна Филиппова этиитин өйөөн, бу сатыы хаамыы акциятын тэрийдибит”, — диэн бэлиэтээтэ. Салгыы акцияҕа үлэлэспит дьоҥҥо-сэргэҕэ Махтал суруктары туттарда.
Көһөрүллүү түмэлин салайааччыта Марфа Чичигинарова:
— 1955 с. тимир сэргэҕэ Баиннарга аналлаах бэлиэ турбута. Онтон 2005, 2010 сс. нэһилиэк баһылыга Ульяна Атласова көҕүлээһининэн, Баиннар сыдьааннара кыттыһан, эбии бэлиэ тутуллубута. Бабаҕа Бастакы Харбалаттан биир көс тэйиччи сытар. Онон эһиги, үөрэнээччилэр аҕаларгыт, эһэлэргит сатыы хаампыт сирдэринэн айанныаххыт.
Дьаһалга Баиннар аймах, оскуола кэлэктиибэ уонна үөрэнээччилэр кыттыыны ыллылар. Мустубут дьон-сэргэ Кыайыыны уһансыбыт буойуттарга сүгүрүйэн, чуумпуран иһийэн ыллылар. Онтон суолталаах айаҥҥа туруннулар.
Марфа Петрова.
