Зинаида Шестакова чулуу учууталлар күрэхтэрин кыайыылааҕынан ааттанна

Арассыыйа Бэрэсидьиэнин  ыйааҕынан ыытыллар үөрэтэр-иитэр үлэҕэ ситиһиилэрин иһин чулуу учууталларга 200 тыһыынча суумалаах бириэмийэ ананар конкурс өрөспүүбүлүкэтээҕи этабын кыайыылаахтара билиннилэр. Ол туһунан Саха өрөспүүбүлүкэтин үөрэҕириигэ уонна наукаҕа министирин Нюргуна Соколова бирикээһэ таҕыста.

Кыайыылаах 12 киһи ортотугар 3 математика, 2 английскай, 2 алын сүһүөх оскуола, 1 физика, нуучча тылын уонна литературатын, биология уонна химия, история уонна обществознание, технология учууталлара бааллар. Биһиги улууспутуттан Д.П. Коркин аатынан Чурапчытааҕы спортивнай олимпийскай эрэллэри бэлэмниир оскуола-интэринээт английскай тылга учуутала Зинаида Алексеевна Шестакова ааттанна. Зинаида Алексеевна – Саха өрөспүүбүлүкэтин үөрэҕириитин туйгуна, Саха АССР төрүттэммитэ 100 сылыгар аналлаах өрөспүүбүлүкэтээҕи күрэх кыайыылааҕа, М.К. Аммосов аатынан ХИФУ «Педагог-инноватор” анал аат хаһаайына, үөрэтэр-методическай пособиелар, өрөспүүбүлүкэтээҕи курстар автордара, учууталлар Бүтүн Арассыыйатааҕы уонна норуоттар икки ардыларынааҕы методическай таһымнарын тургутар конкурстарын хас да төгүллээх лауреата уонна дипломана.

Кыайыылаах учууталга Зинаида Алексеевнаҕа итии -истиҥ эҕэрдэ, өссө да ситиһиилээх үлэни баҕарабыт.

Бэлэмнээтэ:“Чэбдик” Пресс – центр