Уон үстээх Проня 1935 сыл күһүнүгэр Чурапчы 7 кылаастаах оскуолатын боруогун аан бастаан атыллаабыта.
Икки сыл үөрэнэн түөрт кылааһы бүтэрбитэ. Онтон ыла салгыы үөрэммэккэ үлэһит буолан дьиэтигэр-уотугар көмөлөһөн барбыта. Бастаан биир тэрилтэҕэ харабылынан киирбитэ, онтон сибээскэ почтальоннаабыта, эмиэ да охранниктаабыта.
Прокопий Кривошапкин бэйэтин биир саастыылаахтарын кытары Сэбиэскэй Аармыйа кэккэтигэр ыҥырыллыбыта. Онно 1943 сылтан 1947 сылга диэри сулууспалаабыта, империалистическай Японияны үлтүрүтүүгэ кыттыбыта. Дойдутугар эргиллэн кэлээт эмиэ урукку тэрилтэтигэр – үлэҕэ киирбитэ.
1952 сыллаахтан “Кыһыл үлэ” промартелга чилиэнинэн киирэн бастаан харабыллыыр, онтон аналлаах үөрэҕи бүтэрэн пилорамщиктаабыта.
Кэнники 15 сылга Прокопий Григорьевич Кривошапкин оройуон типографиятыгар оробуочайдаабыта. Манна кини тугу-тугу үлэлээбэтэҕэ баарай: хаһыат кумааҕытын быһааччы кини этэ, линотип металын уулларааччы эмиэ кини, типография туспа мотуорунан үлэлиир эрдэҕинэ аны моторист кини буолара.
Типография кэлэктиибэ былааннаах үлэлэрин аһара толорооһунугар коммунистическай Үлэ удаарынньыга, ыччат настаабынньыга Прокопий Кривошапкин үтүөтэ-өҥөтө улахан. Кини кэлэктиип бүттүүнүн ытыктабылынан туһанара.
1977 сыл сайыныгар типография уонна эрэдээксийэ кэлэктиибэ Прокпий Григорьевиһы бочуоттаах сынньалаҥҥа чиэстээн, бочуоттаан туран атаарбыттара.
Сэмэн ЖЕНДРИНСКЭЙ