Улахан Күөл оскуолатын кэлэктиибэ, дириэктэр Федор Иванов, дириэктэри хаһаайыстыбаннай чааска солбуйааччы Федор Трофимов, профком бэрэссэдээтэлэ Күндүйээнэ Кириллова бэрт эйэлээхтик-иллээхтик, биир сомоҕо буолан үлэлии-хамныы олорор.
Оскуолаҕа иитэр-үөрэтэр үлэни таһынан үгүс тэрээһин бэрт көхтөөхтүк ыытыллар.
Ол курдук, араас кыһалҕалаах дьоҥҥо көмө-тирэх буолуу, бары өттүнэн өйөбүл оҥоруу үгэскэ кубулуйда. Байыаннай дьайыыга ыҥырыллан барбыт олохтоох ыччаппыт Н.П. Макаров төрөппүттэригэр, оскуола бэйэтин үлэһиттэригэр матырыйаалынай көмө оҥоһуллубута, саас муус угуутугар субуотунньук ыытыллыбыта.
Бу күһүн үлэһиппит Н.Д. Попова хортуоскатын хостоон, кууллаан, оннун булларан биэрдилэр. Кыайыы күнүгэр, кырдьаҕастар күннэригэр, үбүлүөйдээх, араас ситиһиилээх дьоммутугар эҕэрдэлэр, сэмэй бэлэхтэр оҥоһуллаллар.
Ол курдук, кырдьаҕастар күннэринэн оҕолор ыалларынан сылдьан үлэ бэтэрээннэригэр, аҕа саастаах дьоҥҥо музыкальнай нүөмэрдээх тиийэн бэйэлэрэ оҥорбут сэмэй бэлэхтэрин туттараллара, ким туохха наадыйарынан тимуровскай үлэни оҥороллоро үтүө үгэскэ кубулуйда.
Ити курдук бэрт эдэр эрчимнээх оскуола кэлэктииибэ үөрэ-көтө үлэлии- хамныы, дьон махталын ыла олорор.
Инникитин даҕаны маннык тутуспутунан бииргэ сылдьыҥ, үлэҕитигэр ситиһии, олоххутугар дьол-соргу аргыстастын.
Любовь Трофимова, Улахан Күөл