Дириҥ бөһүөлэгэр оскуола үөрэнээччилэрин комплекснай спартакиадаларын чэрчитинэн энтузиаст-тренер Альберт Михайлов сырдык кэриэһигэр мини-футбол күрэҕэ буолан ааста. Икки бөлөҕүнэн эдэр футболистар күөн көрсөн киэһэ 20 чааска диэри, бастыыр иһин эриирдээх-мускуурдаах, олус кыраһыабай оонньуулары көрдөрдүлэр.
Альберт Николаевич аҕата Николай Григорьевич Михайлов үүнэн иһэр ыччаттарга, кыттааччыларга, ситиһиини баҕарда уонна уолун сырдык кэриэһигэр ыытыллар күрэххэ сылын аайы бэлэмнэнэн кэлэн кытталларыгар махтанна. Кини уола саҕалаабыт дьарыга, сырата таах хаалбатаҕыттан, футболу оҕо эрэ барыта сөбүлүүр оонньуута буолбутуттан ол онтон олуһун диэн астынарын биллэрдэ.
Олохтоохтор бэлиэтээбиттэринэн күрэхтэһии олус тыҥааһыннаахтык барда. Бииртэн биир күүстээх хамаанда. Эдэр ыспарсымыаннар тиритэ-хорута кыайыыга дьулууру, сыыһа туттан кыайтарыыны-абарыыны, мээчик киирбититтэн өрөгөйдөөх үөрүүнү бүтүннүү биллилэр… Сытыы киирсиилээх оонньуу түмүгүнэн:
1 миэстэ – Төлөй орто оскуолата,
2 миэстэ – Семен Новгородов аатынан Чурапчы орто оскуолата уонна
3-с бочуоттаах миэстэни Василий Соловьев-Болот Боотур аатынан Хатылы орто оскуолатын иитиллээччилэрэ буолары ситистилэр.
Итини таһынан бастыҥ оонньооччуларга, тириэньэрдэргэ анал бириистэр ананнылар:
“Бастыҥ настаабынньык” – Андрей Смирников (Төлөй),
“Бастыҥ тириэньэр” – Федот Федотов (Мындаҕаайы), “Бастыҥ эдэр оонньооччу” – Рома Ноговицын (Сылаҥ), “Кэскиллээх оонньооччу” – Ярик Михайлов (Дириҥ), “Кыраһыабай гол” – Миша Яковлев (Одьулуун), “Кыайыыга дьулуурун иһин” – Семен Ноговицын (Чурапчы гимназията), “Бастыҥ көмүскээччи” – Эрчим Барашков (Хатылы), “Бастыҥ баратаар” – Витя Васильев (Дархан кыһата), “Бастыҥ кимэн киирээччи” – Эрнест Семенов (Төлөй).
Бу курдук үтүө киһи аата умнуллубакка, оҥорбут үлэтин түмүгэ симэлийбэккэ , кэлэр көлүөнэ тириэньэрдэргэ үтүө холобур буолуо диэн эрэнэбит.
Сэмэн Жендринскэй. Хаартысканы Чурапчы үөрэҕин салаата тиксэрдэ