1976 сыл сайыныгар Татьяна Собакина, Хатылы орто оскуолатын ситиһиилээхтик бүтэрэн, төрөөбүт-үөскээбит Мырылатыгар үлэлии киирбитэ. Кинини отделение салалтата “Юбилейнай” ыччат-комсомольскай ферматыгар ыанньыксытынан анаабыта.
Кистэл буолбатах, механизацияламматах хотоҥҥо кыһынын да, сайынын да үлэлииргэ ыарахан этэ. Дьэ ол да иһин сүөсүһүт бэйэтин иннигэр туруоруммут соругун ситиһэргэ туохтан да толлубакка, “икки илиитин ньыппарынан” үлэлээтэҕинэ табыллар курдуга. Татьяна ыанньыксыт үлэтин ити курдук санаанан саҕалаабыта.
Бастаан утаа ыарахаттар, сатаабат, кыайбат буолуу ханна барыахтарай? Ол эрээри күннээҕи эрэсиими таба тутустахха, бэйэ саастыылаахтарын кытта үөрэ-көтө үлэлии сырыттахха барыта тута ааһара. Кыыс үлэтин кыайа-хото тутан барбыта, ынахтара да санаа хоту куһаҕана суохтар түбэспиттэрэ. Онно эбии настаабынньыга Анна Львовна Сергеева сүбэтин барытын толорон, үүтү кудулуччу ыабыта. Үлэлээтэҕин бастакы ыйыгар былаанын валовойунан да, биирдии ыанхтан ыаһыҥҥа да толорбута. Инньэ гынан санаата өссө күүһүрбүтэ. Кини бастыҥнар кэккэлэригэр тахсарга дьулуспута.
Дьулуур уонна тулуур быраан. Күннэр-ыйдар ааһан испиттэрэ. Татьяна Собакина аата отделение, ону ааһан сопхуос үрдүнэн чулуу ыанньыксыттар ааттарын кытта холбуу ааттанара үксээн испитэ.
1976 сылга хас биирдии ынаҕыттан 1656 киилэ үүтү ыан былаанын аһары толорбута. Валовойунан 5 тыһыынча киилэ үүтү сорудаҕын таһынан туттарбыта. Оттон үбүлүөйдээх дьыл бастакы кыбаарталын түмүгүнэн хас биирдии фуражнай ынахтан 233 киилэ ыыр сорудахтааҕын 361 киилэнэн а.э. 153 бырыһыан толорбута.
Орто оскуоланы бүтэрээччилэргэ “Тыа сирэ – ыччат романтиката” диэн девиһинэн производствоҕа тахсан туйгуннук үлэлээбит Татьяна Собакина үтүө холобурунан буолбута.
Сэмэн ЖЕНДРИНСКЭЙ