Калинин аатынан колхуос кырдьаҕас колхуостааҕа А.Ф. Терютин оҕонньор хойуккааҥҥыга диэри колхуоһун үлэтиттэн арахсыбатаҕа. Туох эмэ үлэни булан үлэлиирин сөбүлүүрэ.

1969 сыл сайыныгар Өлөксөй оҕонньор эмээхсининээн Өлөксөөстүүн, син биир урукку сылларга курдук, моой оттообуттара. Кырдьаҕастар 150 центнер 1-кы суортаах оту оттоон колхуостарыгар туттарбыттара. Өлөксөй – уруккута колхуос производствотыгар күнүстэри-түүннэри үлэлээбит киһи. Оттон Өлөксөөс эмээхсин колхуос биир бастыҥ ыанньыксыта этэ.

Өлөксөй оҕонньордоох кыһынын сылгыһыттар звеноларыгар убаһа аһатааччынан Хабарҕалаах үрэҕэр көһөн бараллара. Оҕонньор бэйэтэ сүүсчэкэ убаһаны анал ылан аһатан-сиэтэн, көрөн-истэн кыһыны туоратара. Убаһа кыра-кыра курдук үгүс бүөбэйдэһиини эрэйэрэ. Оттон оҕонньор кинилэри кытта аччыгый оҕолуу бодьуустаһарын сөбүлүүрэ. Уулатыыта, аһатыыта – барыта кыһыҥҥы кылгас күҥҥэ бэйэтэ элбэх түбүгү эрэйэрэ. Өлөксөй кыһынын убаһалары аһатарыгар атын дьон көрүүтүгэр була сатыы-сатыы бодьуустаһар курдук буолара. Холобур, бурдугу сиэтэригэр кини бурдугун хаарга эбэтэр мууска мээлэ куппат буолара. Хаарынан хорууда оҥорон онно кутара. Ону ыйыттахтарына, Өлөксөй оҕонньор: “Оччоҕо ордук ыраастык сииллэр, тугу да ордорботтор. Оттон хаарга куттахха бүтэн эрдэҕинэ сии сатаан баран атахтарынан табыйан кэбиһээччилэр, — диэн кэпсиир буолара.

“Сотору кыстык хаар түһүө. Оттон кулуну кыппай түһэрин кытта ийэтиттэн араарыы саҕаланар. Ол аата Өлөксөй түбүгэ эмиэ салҕанар. Ону тэҥэ кыһынын чугас сылгылары көрүүгэ-истиигэ, аһатыыга кини эмиэ көмөлөһөр. Биир тылынан эттэххэ оҕонньор соло булбат. Оҕонньорбут улаханнык абырыыр. Хабарҕалаах үрэҕэр кыстыы тахсыспатаҕына хайаан даҕаны улаханнык суохтуубут”, — диэн оччотооҕуга сылгыһыттар звеноларын салайааччылара Д.Т. Сивцев ахтыбыттааҕа.

 

Сэмэн ЖЕНДРИНСКЭЙ