Ленин аатынан колхуос чилиэнэ Егоров Петр Иванович 1969 сыллаахха 72 сааһын туолбута. Ол эрээри кини, уруккутун курдук, үлэ үөһүгэр эбэтэр фронт тылынан эттэххэ, инники кирбиигэ сылдьара.
Кини 1887 сыллаахха Одьулуун нэһилиэгэр Дьабыылаҕа төрөөбүтэ. Кыра эрдэҕиттэн үлэни таптыыр буоларга үөрэммитэ. Ол курдук 12 саастааҕар орто үчүгэй охсооччу аатын ылбыта. Онтон элитиэпкэ хотуур куухтатын сэрии сылларыгар тиийэ кытаанахтык туппута. Кырдьаҕас колхуостаахтар сааһын тухары охсубут сирин барытын тэнитэ тардан кэбиһэр эбитэ буоллар, хас да тыһыынча гектарга тэҥнэһиэ этэ, хаспыт тоҥ буора – бэйэтэ булгунньах тэҥэ, туппут бүтэйэ бэйэтэ биир туспа кэпсээн…
Петр Иванович аан бастаан Емельянов аатынан колхуоска, 1931 сыллаахха, чилиэнинэн киирбитэ. Онтон ыла колхуос биир бастыҥ үлэһитэ, удаарынньыга аатырбыта. Хомуур үлэтигэр бэриллэр удаарынай күннэргэ иккилии гектар сири хотуурунан охсон бэйэтин тэҥнээҕин булбат этэ. 1922 сыллаахха Коробейников генерал баандата саба бүрүүкээн киириитигэр Петр Егоров кыһылларга хаһаайыстыбаннай взвод үлэһитинэн сылдьыбыта. Онтон кыһыллар Дьокуускайга көһүүлэригэр, уон иккиэ буоланнар, этэрээт аһылыгын, көлөҕө отун, этин-арыытын 84 көлөнөн Дьокуускайга киллэрбиттэрэ. Кини манна биир көхтөөх кыттыыны ылбыта.
Аҕа дойдуну көмүскүүр сэриигэ Петр Иванович эмиэ кыттыбыта. Кини Чехословакияҕа тиийэ аармыйа саппаас аттарын көрөн-истэн илдьиспитэ. Ардыгар оборуона инники кирбиитигэр эппиэттээх пуостарга туруталыыра. Ол эрээри бу сулууспа киниэхэ уһаабатаҕа. Кытаанах усулуобуйаны тулуйбакка, эмкэ барар буолбута. Кини Чехословакия сиригэр санитарнай ротаҕа түбэспитэ. Манна эмтэнэ-эмтэнэ бааһырбыт дьону сүгүүгэ-көтөҕүүгэ, бэрэбээскилээһиҥҥэ көмөҕө сылдьыбыта. Ити курдук сулууспалыы сырыттаҕына 1944 сыллаахха кининин кырдьаҕаһынан сибээстээн дойдутугар атаарбыттара. Дойдутугар кэлээт Петр Иванович сэрии суоһун-суодалын билбит киһи быһыытынан, үлэ фронугар харса суох үлэлээбитэ. Оҕоттон, дьахтартан састааптаах отчуттарга биригэдьиирдии-биригэдьиирдии, куолутунан, от охсубута. Кини ити күннэргэ бэйэтин сыралаах үлэтинэн уонна дьону үлэҕэ-хамнаска көҕүлээһининэн колхуоһун производстватын улаханнык өрө көтөхсүбүтэ.
Петр Иванович Егоров инники кирбиигэ кэппит бойобуой синьиэлин устубутун да иһин, син биир саллаат, эйэлээх тутуу синьиэлэ суох саллаата этэ. Кини олоҕун устатыгар, колхуоһун да устуоруйатыгар үлэттэн бугул-тэгил булбатах, ыарахаттартан иҥнэн-толлон турбатах дьиҥ чиэһинэй сүрэхтээх колхуостааҕынан биллэрэ. Кини 12 саастааҕыттан 72 сааһын туолуор диэри олоҕор үөрүү да, хомолто да баара. Ол эрээри дьулуурдаах үлэтинэн, дьоҥҥо үтүөнү оҥорор амарах санаатынан ол кытаанахтары туораан олоҕун сэттэ уонтан ордук сылын кэннигэр хааллардаҕа. Үчүгэй саллаат үлэтинэн уонна үтүө суобаһынан хайҕанара. Ол саамай сөп этэ. Ытыктанар кырдьаҕас Петр Иванович оннук саллаат этэ. Кини хойукка диэри колхуоһун производствотыгар күүһэ кыайарынан көмөлөспүтэ. Ол курдук эппиэттээх эбийиэктэргэ харабылынан, бурдук ыраастааһынын бастайааннай үлэһитинэн сылдьара. Оттооһун сайыҥҥы былдьаһыктаах күннэригэр хотуурдаах хорсуна буолара. 1969 сыл сайыныгар колхуоһугар 100 центнер бастыҥ хаачыстыбалаах оту бэлэмнээн туттарбыта. Кини ити курдук саллаат бэрдэ этэ.
Сэмэн ЖЕНДРИНСКЭЙ