Комсомолец Василий Лебедев орто оскуоланы бүтэрэн баран сопхуос производствотыгар үлэлии хаалбыта. Бастаан субан сүөһүнү көрүүгэ күүһүн холоммута, кэлин отделение араас үлэлэригэр аныыр буолбуттара.
Кини ити кэмҥэ бииргэ үлэлиир табаарыстарыгар амарах сыһыаннааҕын, уопсай интэриэһи үрдүктүк тутарын, нэһилиэк уопсастыбаннай олоҕор көхтөөхтүк кыттарын, тустаах үлэтигэр кыһамньылааҕын, лопбааччытын көрдөрбүтэ. Уол ханна да анаммытын иһин толоругаһын, кыайыгаһын иһин салалта уонна оробуочайдар махталларын ылан барбыта. Сотору киниэхэ коммунистическай үлэ удаарынньыгын аата иҥэриллибитэ.
Сайыҥҥы өттүгэр оттуур звеноҕа төһүү үлэһит быһыытынан кыттара. Отделение салалтата ыраах үрэхтэргэ даҕаны анаатаҕына уол биир тылы утары эппэккэ сөбүлэһэрэ. 1978 сыл сайыныгар оройуон чөмпүйүөн отчутун В.П. Седалищев II салайар көлөнөн-илиинэн үлэлиир звенотугар кыдамаһатынан сылдьыбыта. Кинилэр сезон устата хас биирдии киһиэхэ тиксэринэн 56,7 туонна оту соҕотуопкалааннар, сорудахтарын 115 бырыһыан толорбуттара.
Онтон кэлин эдэр оробуочай отделение саамай тутаах, хамсатар күүһэ турар гарааһын оттубута. Кини үтүө суобастаах, кыһамньылаах үлэтиттэн тиэхэньикэ тохтоло суох үлэлээһинэ улахан тутулуктааҕа.
Бастыҥ оробуочайы, көхтөөх комсомолеһы быыбардааччылар Болтоҥо олохтоох Сэбиэтин дьокутаатынан таланнар үрдүк итэҕэли сүктэрбиттэрэ. Онон олохтоох Сэбиэт дьокутаатын быһыытынан, нэһилиэнньэ, ордук ыччаттар ортолоругар үгүс өрүттээх үлэни ыытара. Бэйэлэрин кытары бииргэ булкуһа сылдьар буолан эдэрдэр киниттэн холобур ылаллара, убаастыыллара. Сыахтааҕы комсомольскай тэрилтэ бүрүөтүн чилиэнэ, үчүгэй майгылаах, эйэҕэс табаарыс буоларынан Василий Лебедевтэн үчүстэр мунаарар боппуруостарыгар сүбэ-ама ылаллара, олохторугар-дьаһахтарыгар, үлэлэригэр-хамнастарыгар күчүмэҕэйдэр үөскүүр түбэлтэлэригэр кини табаарыстыы, истиҥ сүбэтин иһиттэхтэринэ табыллара.
Иллэҥ кэмин Василий ыччаттар көрдөрүн-нардарын тэрийсэн, успуордунан дьарыктанан, уус-уран самодеятельноска кыттан атаарара.
Отделение комсомолецтара төһүү үлэһити, көхтөөх уопсастыбанньыгы оройуоннааҕы XXIX комсомольскай кэмпириэнсийэҕэ дэлэгээтинэн талбыттара.
Сэмэн ЖЕНДРИНСКЭЙ