Саха сиригэр тиэхэньикэни туһаныы саҥа саҕаланан эрэр кэмигэр 1936 сыллаахха Чурапчыттан Гаврил Григорьевич Макаров тырахтарыыстар куурустарын үөрэнэн бүтэрбитэ.

Кини ХТЗ тыраахтырга үлэлиир быраабы ылбыта. Ити кэмтэн ыла кини тиэхэньикэҕэ 40 сыл устата үлэлээбитэ. Ол сыллартан Гаврил Григорьевич 25 сылын аҥардас МТС-ка анаабыта уонна оройуон биир бастыҥ үлэлээх тырахтарыыһынан буолары ситиспитэ. Ити кэнниттэн колхуоска мэхээньигинэн, биригэдьииринэн үлэлии сылдьыбыта. 40 сыллаах үлэтин кэлин иккки сылын Субуруускай аатынан сопхуос Сылаҥнааҕы отделениетыгар тимир ууһунан үлэлээбитэ.

1969 сыллаахха кини 60 сааһын, үлэлээбитэ 40 сыла туолуутун бэлиэтээбиттэрэ, биэнсийэҕэ атаарар үөрүүлээх биэчэрин тэрийбиттэрэ. Онно кинини эҕэрдэлээн сопхуос дирекциятын, парткомун ааттарыттан Б. Баишев уонна биир идэлээхтэрэ Н. Дьячковскай, Н. Макаров о.д.а. тыл эппиттэрэ, сыаналаах бэлэхтэри туттарбыттара.

Гаврил Григорьевич өр сыллаах чиэһинэй үлэтин бэлиэлэринэн “Бочуот Знага” уордьанынан уонна хас да төгүл Бочуотунай грамоталарынан, сыаналаах бэлэхтэринэн наҕараадаламмыта.

“Тыа хаһаайыстыбатын туйгуна” диэн ааты ылары ситиспитэ туоһулууллар.

1941 сыллаахтан ССКП чилиэнэ этэ. Кини бэйэтин таптыыр идэтигэр үгүс ыччаттары ииппитэ. Уон түөрт оҕо амарах аҕата.

Кини кэргэнэ Ульяна Дмитриевна “Дьоруой ийэ” бочуоттаах аатын сүкпүтэ.

Кырдьаҕас, уопуттаах үлэһит бэйэтин төрөөбүт дойдутугар киэҥник биллэрэ, дьон улахан ытыктабылынан туһанара, үтүө доҕор уонна табаарыс этэ.

Биэчэр кыттыылаахтарын эҕэрдэ тылларыгар харда тылы этиитигэр кини ыччаттар тиэхэньикэни баһылыылларыгар, үчүгэй үлэлээх механизатордар буолалларыгар баҕарбыта. Тиһэҕэр “Мин туох баар олоҕум, үлэм түмүгэ биһиги хаан-уруу Коммунистическай партиябыт аатын кытта ыкса сибээстээх” диэн эппиттээҕэ.

Сэмэн ЖЕНДРИНСКЭЙ