Саха сиригэр быйыл кырдьаҕастарга аналлаах саҥа интэринээт-дьиэ тутуллан үлэҕэ киирэрин туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.
Эбийиэк Мэҥэ Хаҥалас улууһун Матта сэлиэнньэтигэр Дойду Бэрэсидьиэнэ Владимир Путин көҕүлээбит “Демография” национальнай бырайыак чэрчитинэн тутуллар. 51 куойкалаах интэринээт-дьиэ кырдьаҕастары уонна инбэлииттэры сылы эргиччи көрөргө ананыаҕа. Биэс тыһыынчаттан тахса квадратнай миэтэрэ иэннээх икки мэндиэмэннээх дьиэ олорор уонна уопсай дьиэлэрдээх буолара былааннанар. Манна 15 уонна 16 олорор дьиэ хосторунан суоттанан оҥоһуллар.
Бастакы этээскэ инбэлииттэргэ анаан иккилии миэстэлээх үс хос көрүлүннэ. Маны таһынан 46 миэстэлээх остолобуойдаах. Бу этээскэ уһанар мастарыскыай, таҥас сууйар кыладабыай, техническэй хостор баар буолуохтара.
Уопсай блок иккис мэндиэмэнигэр мэдэссиинэ хоһо, култуурунай-маассабай уонна физкултуура кэбиниэттэрэ, куруһуок ыытар уонна административнай хостор көрүлүннүлэр. Эстрада, артыыстар, көстүүм уурар хостору таһынан 42 миэстэлээх аактовай саала тутулунна. Физкултуура саалатыгар тириэньэр хоһо, инбэлииттэргэ анаан дууштанар сир, туалет бааллар.
Ону кытта кинигэ харайар бибилэтиэкэ баар буолуоҕа.
Бу иннинэ маннык эбийиэктэр Томмот, Бүлүү, Өлүөхүмэ куораттарынан, Нам оройуонугар тутуллан үлэҕэ киирбиттэрэ.
“Бу тэрилтэлэр сүрүн соруктарынан — оройуоннарынан кырдьаҕастар көхтөөх сынньалаҥнарын тэрийэр кииннэр буолаллар», — диэн СӨ Ил Дархана Айсен Николаев этэр.
Сэмэн ЖЕНДРИНСКЭЙ