Дьокуускай куорат олохтоохторо “Вместе с президентом” диэн саҥа баннердарга болҕомтолорун уурдулар. Манна биирдэстэригэр чурапчылар биир дойдулаахпыт Валерий Герасимов мэтириэтэ ойууламмыт.
Валерий Петрович Сунтаар улууһун Бордоҥ нэһилиэгэр 1956 сыллаахха атырдьах ыйын 23 күнүгэр төрөөбүтэ. Култуура үөрэхтээҕэ, Чурапчы күтүөтэ. Чурапчы улууһугар үлэтин 1980 сыллаахтан Төлөй сынньалаҥ кииниттэн саҕалаабыта уонна күн бүгүнүгэр диэри култуура эйгэтигэр эҥкилэ суох үлэлии-хамныы сылдьар.
Валерий Петрович олоҕун устатын тухары улууспут култууратын, төрүт үгэһин, уопсастыбаннай олоҕун сайыннарыыга үлэлээн кэллэ. Улууспутугар кинини билбэт киһи суох. Биир бас-көс алгысчыппыт, улуус улахан тэрээһиннэрэ, баараҕай тутуулара кини алгыһа суох ааспаттар. Билигин кини улуустааҕы култуура салалтатын иһинэн тэриллибит Олоҥхо киинин норуот айымньытын жанрдарын исписэлииһинэн үлэлиир.
Кини үлэтин, ситиһиилэрин сыаналаан, киниэхэ анаабыт наҕараадалара үгүстэр. Олортон сүрүннэрин эттэххэ, кини СӨ Култуура туйгуна, СӨ Култууратын үтүөлээх үлэһитэ, СӨ “Гражданскай килбиэн” хаһаайына, Чурапчы улууһун Бочуоттаах олохтооҕо, о.д.а.
Валерий Петрович айылҕаттан бэриллибит уус-уран тыллаах. Дойдубут Бэрэсидьиэнигэр Владимир Путиҥҥа бэйэтин хомоҕой тылын анаабытын, санаатын үллэстибитин таһаарабыт:
“Улуу Өксөкүлээх эһэкэйим ураннаан-уустаан этэринии, Сэргэй Сибиэрэп убаккайым силиктээн ситэрэн туойарыныы, олоҥхолуур саҕаттан олохтонон кэлбит оһуор-ойуу тылынан кэпсиир кэпсээним бу курдук, этэр этиим маннык.
Илин итии муораны, иһит иитин курдук, эргийэ түһэ сытар Эмиэрикэ эрэстииттэрэ сэттээхтик сананар, эргистээн көрөр, элиэтээн ааһар алдьархайдаах кэмнэригэр, сир киэнэ дьуларыйар оройо буолбут Дьобуруопа омуктара олуйсар-моһуйсар, күөтэһэр-күөмчүлэһэр күчүмэҕэй кэмнэригэр, аан ийэ дойдуну аҥардастыы баһылыктаары, орто туруу дойдуну соҕотохтуу тойоргоору, ийэ сири кинилэр эрэ иилээрии-саҕалаары, Арассыыйа Эбэ хотуммутун атыйахтаах уу курдук аймаары, дьоллоох олохпутун огдолутаары оһол уола оп-соллоҥ, обот мэнэгэй, Уот Солуонньай обургуну орто дойду уорҕатынан оонньотон аххан эрэллэр, иирээн төрдө буолбут иирэр илбис кыыһа тиил тилинньэх, лабаа тохтунар, торҕо түүрэй Куо-Кустуктай обургуну сэттэ омук сэгээк ырыатын ыллатан, аҕыс омук айдаан саҥатын айаардан, тоҕус омук ходьоох тойугун туойтаран аххан эрэллэр. Кинилэр бэйэлээхтэр эҕэрдэлээх эйэни билиминэ, өйдөтүүлээх үтүө сүбэни истиминэ, өй сүүйсүһэн, дэҥ үктэтэн, талыыр-халыыр сэриигэ таластылар.
Онуоха Дойдубут Президенэ Владимир Владимирович Путин ыраас сүрэхтээхтэри, сырдык санаалаахтары эйэҕэ, көҥүлгэ ыҥырда. Кини дорҕоонноох сата-буурай саҥата сүүһүнэн мөлүйүөннэр сүрэхтэрин тэбиитэ буолан, күн сирин көҥүлгэ дьулуһааччыларын күүрээннээх санааларын күүһүртэ.
Ханнык баҕарар харгыстартан халаан курдук хаайтарбакка, иннин диэки дьүккүөрдээхтик күрсэр, күнтэн күҥҥэ өрө күүрдэр, саҥалыы санааны айхаллыыр, дьон-норуот соргутун тускулуур, кэлэр иннибитин кэскиллиир, модун күүспүт мэктиэтэ Владимир Владимирович Путины төлкөлөөх түөнэ маҥан түөрэхпит түҥнэстэ түспэтин туһугар, биир булгуруйбат санаанан өйүүбүн! Уруй-Туску! Айхал-Мичил! Уруй-Айхал!”
Елена Макаринская