Чурапчы улууһунааҕы айылҕа харыстабылын судаарыстыбаннай иниспиэксийэ, оҕолор кыра саастарыттан тулалыыр эйгэлэрин харыстыылларыгар анаан уруоктары ыытан саҕалаатылар. Бу туһунан бэҕэһээ СӨ экологияҕа министиэристибэтин пресс-сулууспата иһитиннэрдэ.
Бэҕэһээ о.э тохсунньу 27 күнүгэр, Чурапчы нэһилиэгин килбэйэр киинигэр турар Прасковья Борисова аатынан “Улыбка” оҕону сайыннарар киин-уһуйааныгар (сэбиэдиссэй Екатерина Иванова), үрдүкү судаарыстыбаннай иниспиэктэр Олег Оконешников уонна айылҕа ураты харыстанар сирдэрин, заповедниктарын судаарыстыбаннай иниспиэктэрэ Владимир Павлов 25 иитиллээччигэ анаан экологическай уруок ыыттылар. Иниспиэктэрдэр “Улууска баар харамайдар” диэн тиэмэҕэ викторина ыыттылар уонна экологическай угуйук-киинэ көрдөрдүлэр.
Кырачаан иитиллээччилэр болҕомтолоохторунан уонна интэриэстээхтэринэн кэлбит ыалдьыттары улаханнык сөхтөрдүлэр. Түмүккэ экологтар уһуйааҥҥа анаан энциклопедияны уонна экологическай букубаары бэлэхтээтилэр. Оҕолор бэлэх тутаннар үөрдүлэр-көттүллэр уонна тутатына былдьаһа-тарыһа көрбүтүнэн бардылар.
“Биһиги уһуйааммытыгар айылҕа харыстабылын үлэһиттэрэ бу бастакы сырыылара буолбатах. Тулалыыр эйгэни харыстыыр үөрүйэҕи оҕоҕо кыра сааһыттан иҥэриэхтээхпит, биллэн туран, айылҕаны, кыылы-сүөлү харыстыыр баҕа санаа хас биирдии киһиэхэ оҕо сааһыттан үөскүүр”, — диэн уһуйаан сэбиэдиссэйэ, СӨ үөрэҕириитин туйгуна, улуус мунньаҕын дьокутаата Екатерина Семенова Иванова эттэ.
Сэмэн ЖЕНДРИНСКЭЙ. Хаартыска Саха сирин Экологиятын тиксэриитэ