Бүгүн, улуус баһылыгын нэдиэлэтээҕи мунньаҕар, эрдэ Чурапчы улууһун баайын-дуолун бас билии кэмитиэтин өр сылларга үтүө суобастаахтык салайан кэлбит Рустам Романович Даниловы, “Чурапчы улууһа” МО баһылыгын 1-кы солбуйааччытын эбээһинэһин толорооччунан аныылларын туһунан иһитиннэрдилэр.
Итинник улахан сонуну таһаарааппытын кытары оройуоммут олохтоохторо “оччоҕуна КУМИ салайааччытынан кими анаатыларый?” диэн ыйытыныы биэрдилэр.
Бүгүҥҥүттэн о.э. тохсунньу 27 күнүттэн, Чурапчы улууһун баайын-дуолун бас билэр кэмитиэт салайааччытын эбээһинэһин толорооччунан икки үрдүк үөрэхтээх Дария Юрьевна Барашкова ананна.
ЫСПЫРААПКА. Дария Юрьевна Барашкова 1982 сыллаахха атырдьах ыйын 15 күнүгэр Ньурба улууһун Хорула нэһилиэгэр Людмила Николаевна уонна Юрий Афанасьевич Мамаевтар дьиэ кэргэттэрингэр бастакы оҕонон күн сирин көрбүтэ. Оскуолатааҕы оҕо сааһа Горнай улууһун Ааһыма нэһилиэгэр ааспыта. Үлэтин 2003 сыллаахха Дьокуускай куорат дьаһалтатын сир сулууспатыттан саҕалаабыта. 2008-2017 сылларга Чурапчы улууһун дьаһалтатыгар “Одно окно” МУП дириэктэрин солбуйааччытынан, 2018 сыллаахха кадастровай инженеринэн оттон 2022 сыллаахтан КУМИ салайааччытын сир боппуруостарыгар солбуйааччынан бэрт таһаарылаахтык үлэлээн кэллэ. Кэргэннээх, үс оҕо амарах ийэтэ.
Эдэр, эрчимнээх салайааччылар инники үлэлэригэр-хамнастарыгар ситиһиини, кытаанаах доруобуйаны баҕарыаҕыҥ!
Сэмэн ЖЕНДРИНСКЭЙ