Бүгүн, тохсунньу 28 күнүгэр СӨ “Арассыыйа Ийэлэрэ” Бүтүн Дойду уопсастыбаннай хамсааһынын эрэгийиэннээҕи отделениетын Бэрэссэдээтэлэ Прасковья Петровна Борисова төрөөбүт күнүн бэлиэтиир.
Прасковья Петровна туһунан официальнай СМИ-гэ олус аҕыйахтык суруллар. Ол эрэн кини “Арассыыйа Ийэлэрэ” хамсааһыҥҥа күн бүгүнүгэр диэри сылайары билимэккэ, бириэмэни аахсыбакка бүтүн бэйэтин анаан, сүрэҕинэн-быарынан, үтүө санаатынан, олоххо тапталынан сүүрэ-көтө сылдьар үтүөкэннээх киһибит буолар. Кини көмөтүнэн, кинини кытары кэпсэппит киһи хайаан даҕаны инникигэ кынаттанар, күүстээх энергиянан сэрээттэнэр.
Прасковья Петровна көҕүлээһининэн өрөспүүбүлүкэҕэ дьиэ кэргэн үгэстэрин харыстааҕыҥҥа, оҕону, ыччаты иитиигэ, элбэх оҕолоох эдэр ыаллары өйөөһүҥҥэ туһуламмыт үгүс бырайыак олоххо киирдэ. Кини төрүттээбит бырайыактара Саха сиригэр ситиһиллэннэр, ол ону атын эригийиэннэр эмиэ үтүктэннэр тиһэҕэр бэдэрээлинэй кыаҕы ылынан, үтүө холобурунан буоллулар. Ол түмүгэр Прасковья Борисова үгүс ыалга көмөлөстө, көмөлөһөр даҕаны. Бүтүн Саха норуота, Чурапчы улууһун олохтоохторо эн үтүө сыһыаҥҥар, улахан кыайыылаах-хотуулаах дьыалаҕар дириҥник махтаналлар!
Прасковья Петровна Борисова ылсыбыт дьыалата хаһан баҕарар кыайыылаах, үтүө түмүктэрдээх буолар, атыннык буолуон сатаммат!
Ытыктыыр киһибитин бүгүҥҥү үөрүүлээх күҥҥүнэн эҕэрдэлээн тураммыт кытаанах доруобуйаны, саҥаттан-саҥа дабайыылары, ситиһиилэри, дьолу-соргуну уонна нус-хас олоҕу баҕарабыт!
ЫСПЫРААПКА: Прасковья Петеровна (Черкашина) Борисова 1956 сыллаахха Мэҥэ Хаҥалас улууһун Матта сэлиэнньэтигэр үлэһит дьиэ кэргэнигэр күн сирин көрбүтэ.
Үрдүк үөрэххэ туттарса сылдьан эдэркээн Прасковья аан бастакытын Егор Борисовы кытары билсиспитэ. Чурапчыттан төрүттээх эр бэрдэ ити бириэмэҕэ номнуо механизатордар факультеттарыгар 2-с кууруска үөрэнэ сылдьара.
Икки сыл буолан баран, 1977 сыллааахха, Прасковья иккис кууруһу бүтэрэрин саҕана, Чурапчыга Борисовтар тэлгэһэлэригэр уруу тэриллибитэ. Бастакы оҕолоро Елена Новосибирскай куоракка төрөөбүтэ.
Прасковья Петровна үөрэҕин бүтэрэн кэлэн баран Саха сирин Чурапчытааҕы комсомол отделениетын инструкторынан үлэлээбитэ. Иккис кыыһын оҕолонон баран, Саха сирин Чурапчы улууһунааҕы партия оройуоннааҕы кэмитиэтигэр үлэҕэ тахсан маҥнай инструкторынан онтон кэлин парткабинет сэбиэдиссэйинэн үлэлээбитэ.
1990 сыллар бүтүүлэригэр СӨ бырабыыталыстыбатын уонна бэрэсидиьиэн дьаһалтатын докумуон үлэтигэр отделын баһылаабыта. Прасковья Петровна олоххо тутуһан кэлбит этиитинэн: “Дьон туһунан куһаҕаны санаамыахха, дьон туһунан куһаҕаны кэпсэтимиэххэ уонна дьоҥҥо куһаҕаны оҥорумуохха”, — диэн буолар.
Сыралаах үлэтэ үрдүктүк сыаналанан СӨ гражданскай сулууспатын туйгуна, “Гражданскай килбиэн” бэлиэлэринэн наҕараадаламмыта.
Сэмэн ЖЕНДРИНСКЭЙ