Төлөйдөр спорт саала тутуллуутун туруорсаллар

Хоптоҕо нэһилиэгин кэнниттэн салгыы улуус баһылыгын социальнай боппуруостарга солбуйааччы Мария Кронникова салайааччылаах бөлөх Төлөйгө тиийэн отчуоту оҥордо, олохтоохтор боппуруостарыгар хоруйдаата.
Мунньаҕы нэһилиэк баһылыга Игорь Николаев салайан ыытта. Дакылаат кэнниттэн «Чурапчы улууһун бочуоттаах бэтэрээнэ» бэлиэни Петр Хоютановка, өйдөбүнньүк бэлиэлээх улуус баһылыгын Махталын Илья Чепаловка туттардылар.

Төлөйдөр бастатан туран, нэһилиэктэригэр гаас ситимэ тардыллыытын, доруобуйа харыстабылын үөрэҕэр көрүллэр тус сыаллаах миэстэлэри, олор барыстаах өрүттэрин туһунан ыйыталастылар. Тыа хаһаайыстыбатыгар үүт харчытын төлөбүрүн, «Чурапчы» ТХПК оҥорон таһаарар бородууксуйатын сыаната ыараабытын, бэдэрээлинэй тыраассаҕа дьиэ кыыллара чугас баалларын туоһулуур суол бэлиэтин туруорууну туоһуластылар. Итини сэргэ олохтоохтор элбэх оҕолоохторго көрүллэр көмөлөр, хаарбах дьиэ бырагырааманан саҥа уопсай дьиэ тутуллуутун, босхо уонна бэйдиэ сылдьар ыттарга ылыллар миэрэлэр, ГТО нуорматын туттарыы туһунан сурастылар.
Этиилэргэ хаһыс да сылын спорт саала тутуллуутун, оскуолаҕа Степан Тихонович Захаров аатын иҥэриини, бэдэрээлинэй тыраассаҕа автобус тохтобулун оҥорору туруорустулар.

Мунньахха 76 киһи кыттыыны ылла уонна улуус дьаһалтатын былырыыҥҥы үлэтин сөптөөҕүнэн сыаналаатылар.

Людмила Горохова.