1974 сыллаахха Мэлдьэхси эҥэринэн түөрт көс усталаах сайылык остоолбо бүтэйинэн иилии эргитиллибитэ. Онно Эрилик Эристиин аатынан сопхуос Хоптоҕотооҕу отделениетын түөрт уонча атыырын үөрэ сайылыыр кыахтаммыта. Манна оройуон биллиилээх сылгыһыта Василий Толстоухов, сылгыны тыыннаах иитиигэ, киниттэн үчүгэй төрүөҕү ылыыга дьоһун ситиһиилэммит Д.Е. Васильев I, эдэр сылгыһыт Виктор Габышев курдук сопхуос киэн туттар дьонноро үлэлииллэрэ.
Бу звено 1974 сылга кулун деловой тахсыытын ити иннинээҕи сыллардааҕар 15 бырыһыанынан үрдэппитэ, тохсус пятилетка түөрт бастакы сылыгар 1369 кулуну ылбыта. Оттон кыылы иитээччи Толстоухов, 1973 сыллаахха улахан сылгытын биири да энчирэппэккэ ииппитэ уонна 124 биэттэн 117 кулуну ылан сопхуоһугар туттарбыта. Ити оччотооҕуга хаһаайыстыба орто көрдөрүүтүттэн 16,9 бырыһыанынан үрдүк этэ. Биэс сылга 383 кулуну ылар былааннааҕын түөрт сыл иһинэн 16-нан куоһурбута.
Чулуу сылгыһыт Василий Романович ССРС НХСБСБ боруонса мэтээлинэн наҕараадаламмыта. Бүтүн Сойуустааҕы куоталаһыыга 1973 сыл түмүгүнэн оройуон чөмпүйүөн сылгыһытын аатын ылбыта. Оттон 1974 сылга киниэхэ ОРОЙУОН ЧӨМПҮЙҮӨН-РЕКОРДСМЕН сылгыһытын аата иҥэриллибитэ.
Тохсус пятилетка түмүктээһиннээх сылыгар Хоптоҕо сылгыһыттара улахан сылгы 98 бырыһыаныттан итэҕэһэ суоҕун тыыннаах иитэргэ, хас да сүүстүү ийэ биэ ахсыттан 80-тан итэҕэһэ суох кулуну ыларга хардары былааны ылыммыттара.
Уопуттаах сылгыһыт Василий Толстоухов 1974 сыллааҕы кирбиилэрэ өссө үрдээбиттэрэ: улахан сылгыны тыыннаах иитиини 99 бырыһыантан намтаппакка, төрүөҕү ылыыны 85 бырыһыантан түһэрбэтэҕэ.
Оччолорго ырыганныах быһыытыйбыт сылгылары туспа хаарчахха туруоран аһатан, ийэ биэлэри ордук кичэйэн көрөллөрө-истэллэрэ.
Бэлэмнээтэ Сэмэн Жендринскэй