Ханнык баҕарар омук аһылыга уратылаах буолар. Биһиги тыйыс усулуобуйалаах дойдуга олорор буолан, тымныыны тулуйарга иҥэмтэлээх төрүт аһылыгы тото-хана аһыахтаахпыт.
Төрүт ас – доруобуйаҕа туһалаах. Онон оҕо кыра сааһыттан төрүт аһын аһыы, ас суолтатын өйдүү улаатыахтаах. Сэтинньи 24 күнүгэр “Сулусчаан” уһуйааммыт көҕүлээһининэн, “Саха-сатабыл” диэн алта саастаах оҕолорго маҥнайгы улуустааҕы чемпионат «Повар» компетенциятыгар буолан ааста. Кыра саастаах оҕолор көлүөнэттэн күлүөнэҕэ бэриллэн иһэр үөрүйэхтэри, төрүт үгэстэри, сатабыллары утумнаан илдьэ сылдьалларыгар туһаайыллыбыт уһуйаан инновационнай бырайыагын чэрчитинэн былааннанан ыытылынна.
Чемпионат сыала – уһуйаан саастаах оҕо саха төрүт аһын көрүҥүн, хайдах астанар технологиятын билиитэ, инники идэтин сөпкө таларыгар тирэх буоларыгар туһуламмыт.
Күрэххэ экспердэринэн үлэлээтилэр: Атласовтар этно-уһаайбаларын бренд-шеф повара, Арассыыйаҕа Арктика уонна Саха Сирин кухнятын Амбассадора, элбэх күрэх кыайыылааҕа Н.В.Атласов, Чурапчы улууһун үөрэххэ салалтатын оскуолаҕа киириэн иннинээҕи үөрэхтээһин исписэлииһэ С.Е.Алексеева, «Я-профи» өрөспүүбүлүкэтээҕи оҕо чемпионатын призердарын салайааччыта Х.И.Корякина, “Сулусчаан” уһуйаан иитээччитэ, Сылаҥ нэһилиэгэр төрүт үгэһи тута сылдьар улахан дьиэ кэргэн ийэтэ, «Куолас» бааһынай хаһаайыстыба салайааччыта М.К.Трофимова.
Барыта сэттэ хамаанда улуус уһуйааннарыттан кытыннылар: Мугудайтан “Чуораанчык”, Хатылыттан “Ньургуһун”, Мындаҕаайыттан “Ымыы”, Алаҕартан “Алгыс”, Сылаҥтан “Сулусчаан”, Чурапчыттан “Туллукчаан” уонна “Чуораанчык”. Оҕолор олус үчүгэй бэлэмнэээхтэрин, салайааччылар үрдүк тэрээһиннээхтэрин көрдөрдүлэр. Хамаандалар балаһыанньанан, төрүт үгэстэри тутуһан, “Көбүөрдээх лэппиэскэни” оҥордулар, онтон остуолу дьэрэкээн сахалыы иһитинэн-хомуоһунан сервировкалаатылар. Чемпионат кэтэхтэн быһа биэриинэн улахан харгыһа суох ыытылынна. Муҥутуур кыайыылаахтарынан Чурапчы «Чуораанчык» уһуйааныттан А. Илларионова, С. Скрябина, салайааччылара Л.М. Монастырева, А.Г. Аржакова, буоллулар. Кыайыылаахтар дипломунан, чемпионат кубогынан, Үөрэх салалтатын анал бирииһинэн наҕараадаланнылар. Ситиһиилээхтик кыттыбыт кырачааннарбытыгар, салайааччыларыгар баҕарабыт инникитин да өбүгэлэрбит төрүт дьарыктарын утумнаан илдьэ сылдьаргытыгар, чэгиэн туругу баҕарабыт!
Нарыйа Макарова.