Арассыыйаҕа учуутал уонна уһуйааччы, Саха сиригэр Үлэ, Чурапчы улууһугар Ытыктабыл сылыгар, Сылаҥ орто оскуолата 115 үбүлүөйдээх сылын көрсө профессор Г. П. Башарин аатынан Сылаҥ орто оскуолата А.А. Сивцев аатынан Сылаҥ сынньалаҥ киинигэр алтынньы 13 күнүгэр улахан тэрээһиннээх кэнсиэр көрдөрдө.
Кэнсиэр саҕаланыан иннинэ өр сылларга оҕону үөрэтиигэ үтүө суобастаахтык үлэлээбит, билигин даҕаны эдэр көлүөнэ учууталларга күүс –көмө, сүбэ –ама, өйөбүл, тирэх буолар биһиги уһуйааччыларбытыгар оскуола дириэктэрэ Николай Дьяконов эҕэрдэлээн туран хас биирдиилэригэр «Учуутал уонна уһуйааччы» сылынан бэлиэ туттарда. Ону таһынан оскуолабыт оҕолоро сайын устата агро хайысханан олордубут оҕуруот астарын кэнсиэрбэлээн, өр сылларга үлэлээбит бэтэрээн учууталларыгар уонна үлэһиттэригэр бэлэх ууннулар.
Профессор Г.П. Башарин аатынан агрохайысхалаах Сылаҥ орто оскуолата 2020 сыллаахтан бэйэ тэлгэһэтигэр үүннэрэн уонна алаастан, тыаттан араас эмтээх оту, сэбирдэҕи хомуйан, от чэй оҥорор. Быйыл «Көмүс күһүн -2023» 25-с Арассыыйатааҕы агропромышленнай быыстапкаҕа кыттан икки кыһыл көмүс мэтээл хаһаайыттарыгар, Саха Өрөспүүбүлүкэтин тыатын хаһаайыстыбатын министиэристибэтэ тэрийбит өрөспүүбүлүкэтээҕи «За производство высококачественной продукции» куонкурус кыайыылаахтарыгар агро хайысхатыгар дириэктэри солбуйааччытыгар Лидия Сивцеваҕа уонна оҕону үлэҕэ уһуйуу маастарыгар Сардаана Баишеваҕа оскуола дириэктэрэ Н.В. Дьяконов сибэкки дьөрбөтүн уонна махтал суругун туттарда.
Оскуола кэлэктиибэ түмсүүлээҕин өссө төгүл бигэргэттэ. Учууталлар бары өттүнэн дэгиттэр талааннаахтарын нэһилиэнньэ биһирээтэ, кырдьык даҕаны, биһиги учууталларбыт уран тарбахтарынан, нарын куоластарынан, имигэс үҥкүүһүттэринэн дьону сөхтөрдүлэр.
Кэнсиэр биир тыынынан ааста, бүтэһигэр оскуола кэлэктиибэ бары тахсан Петр Макаров тылларыгар уонна матыыбыгар “Үйэ- саас махтанан туойабыт” диэн ырыанан түмүктээтилэр, хору Егор Яковлев таһаарда.
Оскуолабыт кэлэктиибэ өссө да бу курдук тутуһан дьоһуннаахтык үлэлээн-хамсаан диэн баҕа санаабытын этэбит.
Аграфена Трофимова