Сылаҥ үөрэнээччилэрэ Гавриил Протодьяконов пааматынньыгын туруорууга улахан бачыымы көтөхтүлэр

Ааспыт сыл ахсынньы 9 күнүгэр, Чурапчы улууһун баһылыга Степан Саргыдаев, Улуу Кыайыы өрөгөйдөөх 80 сылын көрсө Сталинград кыргыһыытын Дьоруойа Гавриил Дмитриевич Протодьяконовка аналлаах пааматынньыгы туорууга үп-ас хомулларын туһунан киэҥ далааһыннаах ыҥырыыны таһаарбыта.

Онуоха күн-бэҕэһээ, профессор Георгий Башарин аатынан Сылаҥ орто оскуолатын 8 кылааһын үөрэнээччилэрэ (кылаас салайааччыта Х.И. Корякина), саха буойуна, снайпер-артиллерист, Сылаҥ оскуолатыгар үлэлээбит Гавриил Протодьяконов сырдык аатын, бойобуой суолун үйэтитиигэ, Улуу Кыайыы 80 сылын көрсө уонна Чурапчы улууһугар “Үйэлээх килбиэн” сылынан Дьокуускай куоракка туруохтаах пааматынньыкка 6 тыһыынча сууммалаазх көмөнү оҥордулар.

“Оҕолорбут көмө үптэрин Чурапчы улууһун үөрэҕириитин салайааччытыгар Юрий Посельскайга туттардылар. 8-с кылаастар көмө үптэрин агробырайыак чэрчитинэн бэйэлэрэ үлэлээн киллэриммиттэрэ. Оҕолорбут бу маннык Улуу Кыайыыга анаммыт бачыымнарын, Чурапчы улууһун бары үөрэнээччилэрэ көхтөөхтүк өйүүллэригэр ыҥыраллар”, — диэн Сылаҥ орто оскуолатын дириэктэрин агрохайысхаҕа солбуйааччы Лидия Сивцева кэпсээтэ.

 

Сэмэн ЖЕНДРИНСКЭЙ