



Профессор Г.П. Башарин аатынан Сылаҥ орто оскуолатыгар «Интернат-олохпут биһигэ, үөрэх кыһата» диэн саҥа интернат аһыллыытын үөрүүлээх чааһа буолан ааста.
1917 сылтан Сылаҥ нэһилиэгэр интернат арыллан үлэтин саҕалаабыта. Чугас олорор нэһилиэктэр, учаастактар оҕолоро олорон үөрэммит эбит буоллахтарына, билигин Сахабыт сирин араас муннугуттан медицина эйгэтигэр үөрэниэн баҕалаах 22 оҕо кэлэн, иккис дьиэ оҥостон олорор.




Быйыл 2024-2025 үөрэх дьылыгар саҥа таас толору хааччыллыылаах дьиэҕэ киирэн, үүнэргэ-сайдарга усулуобуйабыт тупсан үөрүүбүт үксээтэ. Чурапчы улууһун үөрэх начаалынньыгын солбуйааччыта Афанасий Максимов күндү ыалдьыт буолан үөрүүбүтүн тэҥҥэ үллэһиннэ.
Улуус баһылыгар Степан Саргыдаевка, улуустааҕы үп-харчы салаатын салайааччытыгар Таисия Брызгаеваҕа, үөрэх салалтатын начаалынньыгар Юрий Посельскайга, Сылаҥ нэһилиэгин баһылыгар Егор Макаровка улахан махталбытын тиэрдиэхпитин баҕарабыт.
Саҥа дьиэ бөҕө эркиннээх, сылаас холумтаннаах буоллун, дьол-соргу уйаланнын!

Л. С. Сивцева