Профессор Г. П. Башарин аатынан агро хайысхалаах Сылаҥ орто оскуолата 2020 сыллаахтан бэйэ тэлгэһэтигэр үүннэрэн уонна алаастан, тыаттан араас эмтээх оту, сэбирдэҕи хомуйан от чэй оҥорор. Киһи доруобуйатыгар олус туһалаах, бэйэ төрөөбүт дойдутун минньигэс чэйин дьон-сэргэ сэргээтэ, сөбүлээтэ. Бу үлэ сыала — соруга оҕо доруобуйатын кыра эрдэҕиттэн көрүнэригэр үөрэтии уонна дьиэҥ тэлгэһэтиттэн, чугас тыаттан-хонууттан хомуйан, үгүс ороскуота суох, бородууксуйа оҥоруохха сөбүн үөрэтии, урбаан дьыалатыгар сыһыарыы.
От чэйи оҥорууга кэллэктиип барыта кыттар. От ыйын бастакы күннэригэр хомуйабыт. Салгыы үлэ биригээдэтин уонна күнүскү лааҕыр оҕолоро ыраастыыллар, куурдаллар. Үөрэх сыла саҕаланнаҕына оҕолор от чэйи кыраһыабай хааларга куталлар, атыыга таһаараллар. Үлэни оҕолору үлэҕэ уһуйуу маастара, СӨ үөрэҕириитин туйгуна Сардаана Баишева салайар.
Үс сыл устата түөрт араас от чэйи оҥордубут, быыстапка-дьаарбаҥкаларга кытынныбыт, оҕолор чинчийэн, научнай-практическай конференцияларга ситиһиилээхтик дакылаат аахтылар. Онтон бу балаҕан ыйыгар СӨ тыатын хаһаайыстыбатын министиэристибэтэ тэрийбит өрөспүүбүлүкэтээҕи «За производство высококачественной продукции» куонкуруска кытынныбыт.
Бородууксуйабыт өрөспүүбүлүкэтээҕи ас-үөл технологиятын киинигэр (РЦПТ) улахан эспэртиисэни ситиһиилээхтик ааста. Ол түмүгэр «Таҥара чэйэ» диэн хара баайхабай уонна боҕуруоскай оттоох чэйбит «За новый продукт в линейке производства высококачественных безалкогольных напитков и чистой воды» хайысхаҕа кыайыылаах дипломун ылла. Онтон «За производство высококачественных безалкогольных напитков» хайысхаҕа «Сарсыардааҥҥы саһарҕа» диэн от чэйэ иккис үрдэллээх диплому, «Нуурал» уонна «Моонньоҕон» диэн от чэйдэр үһүс үрдэллээх диплому ылары ситистилэр. Бу кыайыынан уостан хаалбакка, саҥа сыалга-сорукка бары түмсэн үлэлииргэ бэлэммит. Биһиги бу үлэбитигэр АГАТУ профессора, тыа хаһаайыстыбатын билимин дуоктара Константин Степанов көмөлөһөр, сүбэлиир-амалыыр. Онон науканы уонна быраактыканы бииргэ тутан үлэлээһин үтүө түмүктээх буолла.
Л.С.Сивцева дириэктэри агро хайысхаҕа солбуйааччы.