Сылаҥҥа 1638 сылтан саҕалаан биэс бөһүөлэк түмүллэн олорор сирэ: Бэрэ, Улахан Күөл, Түөйэ, Дьаарылла уонна Ууһун Күөл киин сэлиэнньэ буолар. Өссө түҥ былыр Уһун Күөлү, Дьаарылланы холбооннор Аччаҕар дииллэр эбит.
Саҥа эмбилиэмэни оҥорууга нэһилиэк дьаһалтата улахан куонкуруһу биллэрбитэ. Дьүүллүүр сүбэ бэрэссэдээтэлинэн, Сылаҥ нэһилиэгин Аҕа баһылыга Егор Иннокентьевич Макаров үлэлээтэ. Куонкурус сэтинньи 15 күнүгэр түмүктэнэн, эмбилиэмэ олохтоох дьокутааттар уочараттаах сиэссийэлэригэр көрүллэн күн-бүгүн бигэргэннэ.
Барыта холбоон 11 киһиттэн 29 үлэ киирдэ, түмүккэ Сылаҥнар бэйэлэрин кыыстара, билигин Москуба куоракка олорор, идэтийбит худуоһунньук Мария Петровна Макарова кыайыылааҕынан ааттанна уонна 10 тыһ.суумманан бириэмийэлэннэ.
“Сахаларга харысхал диэн олус күүстээх, үксүгэр эр киһиэхэ туһаныллар. Ураанай Боотур оҕотун харыстаан, кыргыс дьонуттан куоттарар – Сылаҥнар төрүттэрэ ол онтон тэнийбиттэрэ диэн номоххо баар. Биир улахан төрүппүтүнэн, уос номоҕор кэпсэниллэр Улуу Кудаҥса дьонун-сэргэтин тымныыттан, кураантан, суттан өрүһүйэрэ, төрүттэрбит харысхаллара көмөлөһө турдун диэн ис хоһоонноох ити бэлиэбит. Үс төгүрүк ии – салгын, ийэ, буор куттарбыт баар буоллуннар диэн ойууламмыт”, — Сылаҥ нэһилиэгин олохтоох бибилэтиэкэрэ Анастасия Аммосова кэпсиир.
Сэмэн Жендринскэй