Быйылгы сыллаахха өрөспүүбүлүкэҕэ аан бастакытын сахалыы төрүт көрүҥнэргэ бэдэрээссийэ Кубогын иһин хамаанданан улахан күрэхтэһии ыытыллара былааннанар.
Кус быһый, быыппастыгас былчыҥнаах ыспарсымыаннарбыт үүммүт 2024 сыл күрэхтэригэр түһүнээри бэлэмнэнии үгэнигэр сылдьаллар. Боотурдар ыспартыыбынай сезоннара бу кэлэр ыйга саҕаланаары турар. Ол курдук, олунньу ый ортото Бороҕоҥҥо, Уус Алдан улууһун баһылыгын бирииһигэр “Чөмпүйүөн Кубога” ыытыллыаҕа ол кэнниттэн кулун тутар ыйыгар, Чурапчыбыт нэһилиэгэр төрүт көрүҥнэргэ СӨ чөмпүйэнээтэ итиэннэ муус устар устар ыйыгар “Дыгын” Оонньууларыгар сүүмэрдиир түһүмэх финальнай чааһа ыытыллара былааннанар. Бу ааттаммыт хас биирдии күрэхтэһиигэ, сыл бастыҥ турнирыгар “Дыгын” Оонньууларыгар кыттарга, түөртүү лицензия бэриллэр.
Үүммүт дьылга, СӨ төрүт көрүҥнэрин бэдэрээссийэтин былааныгар 10-ча улахан тэрээһин суруллан сылдьар. Үөһэ этиллибит чөмпүйүнээттэри, турнирдары сэргэ сыл бүтүүтэ, улуустар хамаандаларын икки ардыларыгар бэдэрээссийэ Кубогын иһин турнир буолуоҕа.
Сыллааҕы былааҥҥа, Уус Алдаҥҥа оскуола оҕолорун ортотугар “Добун түһүлгэтэ”, Нам улууһугар “Үрүҥ Уолан”, Дьокуускай куоракка “Бэргэн” Оонньуулара,
Чурапчы улууһугар эр дьоҥҥо “Тоҕус Томтор” Оонньуулара дьэҥкэтик суруллан сылдьаллар. Итини таһынан, Ыһыахтар кэмнэригэр үтүө үгэскэ кубулуйбут улуус, нэһилиэк биллэр турнирдара: Аммаҕа “Сахаачча” Оонньуулара, “Амма боотура”, Бүлүүгэ “Бүлүү Боотура”, Кэбээйи оройуонугар “Уолан Боотур”,
Чурапчы улууһугар “Эрилик” Оонньуулара, “Алаҕар хоһууна”, “Кыыдаала” Оонньуулара, Сунтаарга “Маччаҕа бөҕө”, Таатта улууһугар “Алаас Боотура” о.д.а. интэриэһинэй күрэхтэһиилэр күүтэллэр. Быйыл Амма улууһугар ыытыллар Олоҥхо Ыһыаҕын иитинэн “Эр Бэрдэ” турнир буолара күүтүллэр.
Сэмэн Жендринскэй. Хаартыска ааптар тус архыыбыттан