Профессор Георгий Башарин аатынан Сылаҥ орто оскуолата балаҕан ыйын 21 күнүгэр 115 сыллаах үбүлүөйүн бэлиэтээтэ. Ити күн сарсыарда эрдэттэн оскуола киэргэнэн-симэнэн, ырыата дьиэрэйэн үгүс-элбэх выпускниктарын, ааспыт сылларга үлэлээн ааспыт үтүө-мааны дьоннорун дьоһуннук көрүстэ.
Үбүлүөй биир бэлиэ түгэнэ, элбэх ыалдьыт болҕомтотун ылбыт – СӨ Ил Дарханын Гранын кыайыылааҕа “Трудовой отряд подростков “Башаринцы”” бырайыак сүрэхтэниитэ буолла. Презентацияҕа үбүлүөйгэ кэлбит ыалдьыттар, “Чурапчы улууһа” МТ баһылыгын 1-кы солбуйааччы Егор Сивцев, улуус үөрэҕин управлениятын салайааччыта Юрий Посельскай, оскуола дириэктэрдэрэ сырыттылар.
Бырайыак ааптара СӨ үтүөлээх учуутала, дириэктэри агро хайысхаҕа солбуйааччы Лидия Сивцева бырайыагы сиһилии билиһиннэрдэ. Сүрүн сыалынан “Башаринец” үлэ биригээдэтин нөҥүө элбэх оҕолоох дьиэ кэргэн оҕолоругар сөптөөх усулуобуйаны тэрийэн, тыа сирин үлэтин сатабылларын иҥэрии уонна олох дэгиттэр үөрүйэхтэрин (soft-skils) сайыннарыы, идэҕэ туһаайыы буолар. Манна кытталлар: оскуола үөрэнээччилэрэ, Сылаҥ нэһилиэгин элбэх оҕолоох дьиэ кэргэттэрэ. Бырайыак туохха олоҕурда, туохтан төрүөттэннэ?
— Профессор Георгий Башарин “Прививайте любви к сельскому труду с малых лет” диэн кэс тылыгар;
— 2021-2023 сылларга сайыҥҥы үлэ биригээдэтин ситиһиилээх үлэтигэр. Бу сылларга 565 киилэ диетическэй, иҥэмтиэлээх көтөр этэ атыыланна;
— Түргэнник ситэр көтөрү иитии-үөрэнээччи сайыҥҥы сынньалаҥын кэмигэр түмүгэ көстөр табыгастаах үлэ;
— Куһу-хааһы иитии оҕо сөбүлүүр уонна кыайар үлэтэ;
— Инникитин үөрэнээччи бэйэтин дьыалатын тэринэригэр сөптөөх сатабыллары иҥэриниэ диэн санааттан.
Бырайыак үлэтин от ыйын маҥнайгы күнүттэн саҕалаабыта. Оҕолор икки ый устата түргэнник ситэр Агидель боруода куһу уонна КОБ 500 боруода бройлер чоппуускалары көрдүлэр–иһиттилэр. Атырдьах ыйын бүтэһик күннэригэр оскуолаҕа туттардылар.Салгыы үлэҕэ уһуйуу маастара М.П. Макарова салалтатынан, аныгы тэриллэринэн эт бородууксуйатын оҥорон таһаарыахтара. Билиҥҥи кэм дэгиттэр сатабылларын баһылыахтара.
Презентацияҕа 997.000 солкуобай сууммалаах Грант үбүнэн көтөр этиттэн бородууксуйа оҥорон таһаарар оборудованиялар быыстапкаҕа туруорулуннулар: Брудер,аҕыйах хонуктаах чоппуускалар уйалара; Перощипалка; Көтөр иһин ууну ыһан ыраастыыр СПРУТ остуол; Эти кыралыыр пила; Ваакумнай упаковщик; Морозильнай ларь; Разделочнай остуол; Быһахтар.
Салгыы 11кылаас үөрэнээччитэ Алеша Дьяконов, сүрдээх үөрүйэхтик туттан-хаптан бройлер этин салгыны оботторон, ваакумнаан, пленканан суулаата. Оҕолор үлэлэрин туһунан, тугу билбиттэрин-сатаабыттарын уонна сотору дойду тэбэр сүрэҕэр Москубаҕа ВДНХ баралларын кэпсээтилэр. Бырайыак салайааччыта, оскуола выпускницата, оҕо иитиитин хайысхатыгар үлэлиир “Коркинец” общественнай тэрилтэ толоруулаах дириэктэрэ О.Г. Кардашевская эҕэрдэлээтэ уонна атын оскуолалары бырайыактарга үлэлэһэргэ ыҥырда.
Лидия Сивцева онон быйылгыттан ыла көтөр этин полуфабрикат оҥорон, үрдүк сыанаҕа атыыланыахтаахтарын, бу оборудованиялар дьиэҕэ-уокка туттуллуон сөптөөхтөрүн бэлиэтээтэ. Көтөр этиттэн полуфабрикат оҥорон таһаарар сыах улэтэ өссө да кэҥиэ, сайдыа. Онно үөрэнээччилэр үлэлиэхтэрэ диэн былааны,оҕолор бырайыак чэрчитинэн финансовай грамотноска, урбаан дьыалатыгар үөрэниэхтэрэ диэн кэпсээтэ.
“Трудовой отряд подростков “Башаринцы”” бырайыакка үлэһит, сүрэхтээх, дьулуурдаах, хамаандаҕа үлэлиир баҕалаах, барыстаахтык үлэлиири өйдөөбүт, бэйэтин дьыалатын тэринэр санаалаах оҕону иитэн таһаарыахтаахтаахпыт.
Лидия Сивцева, бырайыак ааптара
Бэлэмнээтэ Сэмэн ЖЕНДРИНСКЭЙ