Дьиҥэр бу оруннаах ыйытык. Үүммүт 2025 сылга Былатыан Ойуунускай аатынан Саха тыйаатыра 100 сыллаах үбүлүөйүн бэлиэтиэҕэ. Онно сөп түбэһиннэрэн айымньы суруллубут төрүт буоругар кэлэн көрдөрөллөрө буоллар диэн баҕа санаалаахпыт.
Быйылгы үбүлүөйдээх сылга тыйаатыр үлэтин сүрүн режиссера Руслан Тараховскай туруоруутугар, Чурапчылар күөн туттар биир улахан киһибит, Саха норуодунай суруйааччытын Василий Яковлев-Далан “Тулаайах оҕо” испэктээкилинэн саҕалыаҕа. Испэктээги бүгүҥҥүттэн о.э тохсунньу 11-12 күннэригэр көрдөрүөхтэрэ.
Бу испэктээкилгэ солбуллубат оруоллаах артыыс Илья Стручков ийэ дойдутун иннигэр ытык иэһин төлөөн, анал байыаннай дьайыыттан этэҥҥэ эргиллэн кэлэн, тыйаатырга быйыл бастакытын сыанаҕа тахсыаҕа. Бу туһунан тыйаатыр пресс-сулууспата суруйар.
Испэктээк туруоруутугар кыргыһыы хонуутугар тулаайах хаалбыт хорсун сүрэхтээх тоҥ биис кыысчаана Ньырбачаан, Бүлүү бөлөх сахаларын төрүттүүр дьылҕатын быатыгар, өстөөхтөртөн быыһанан тыыннаах хаалар айанын эриирдээх ыллыга улуу Туймаада туһаайыытынан аартыгы арыйарын билиһиннэриэхтэрэ.
Сэмэн ЖЕНДРИНСКЭЙ