Өрөспүүбүлүкэ хирурдарын мобильнай биригээдэтэ Чурапчы уонна Горнай улуустарыгар айаннаары бэлэмнэнэллэр диэн Доруобуйа харыстабылын эрэгйиэннээҕи пресс-сулууспата иһитиннэрэр.
Өрөспүүбүлүкээтээҕи киин балыыһа 2-с нүөмэрдээх суһал мэдэссиинэ киинин хирурдарын мобильнай биригээдээтэ ааспыт ыйга о.э. муус устарга Ньурба, Нерюнгри уонна Мииринэй куораттарыгар үлэлээбитэ. Исписэлиистэр онно тиийэннэр барыта холбоон 49 уустук эпэрээссийэлэри оҥордулар,
ол иһигэр 11 ыарыһахха өттүктэрин үлтүрүйбүт уҥуохтарын оннугар оҥоһук протезтары туруордулар,
тоҕус ыарыһахха лапароскоп көмөтүнэн үөстэрин тааһын түһэрдилэр,
икки ыарыһахха грыжевой ворота пластиктарын уктулар,
18 киһи төрүөхтэриттэн итиэннэ эчэйииттэн эмсэҕэлээбит муруннарыгар ринопластика оҥоттордулар,
сэттэ ыарыһах хаан сүүрэр тымырдарын аныгы рентгенологическай ньыманан диагностикалаатылар (ангиография) о.д.а.
Итини таһынан, үрдүк квалификациялаах исписэлиистэр Ньурба уонна Мииринэй оройуоннарыгар ыарыылары үөрэтиигэр уонна хирургия тиэмэтигэр маастар-кылаастары ыыттылар.
“Биллэн туран, ыытыллыбыт эпэрээссийэлэр түмүктэринэн ыарыһахтар олохторун хаачыстыбатын хайа эмэ өттүн тупсардыбыт, эпэрээссийэ кэмигэр туох даҕаны ыарахаттар тахсыбатылар”, — диэн 2-с нүөмэрдээх өрөспүүбүлүкэтээҕи балыыһа үлэһиттэрэ иһитиннэрэллэр.
Сэмэн Жендринскэй