Бу күннэргэ Болот Боотур аатынан Хатылы орто оскуолатыгар «Сир ийэ» эко-музей үлэтин саҕалаата. Бу музей ыччат сайдыытыгар туhуламмыт СӨ Үүнэр көлүөнэ тус сыаллаах пуондатын үбүлээhининэн олоххо киирдэ.
Үөрүүлээх аһыллыыга оскуола дириэктэрэ Екатерина Егорова эҕэрдэлээтэ. Салгыы 5-с кылаас үөрэнээччилэригэр «Күөх пионердар» хамсааhыннарыгар киирбиттэрин туоhулуур суруктары туттарда.
Судаарыстыба экологияҕа кэтэбилин Чурапчытааҕы инспекциятын бэрэстэбиитэлэ Михаил Догордуров эҕэрдэ тылы эттэ.
«Эко-музей аһыллыыта оройуоҥҥа, өрөспүүбүлүкэҕэ бастакы хардыы буолар. Бу эйгэҕэ ыытыллар тэрээhиннэр хас оскуола, уhуйаан аайы баар буоларыгар баҕарабыт. Айталина Николаевна Чичигинарова илдьэ сылдьар кылааhа, выпускниктара да, экологияҕа сыһыаннаах үлэлэри тиһигин быспакка ыыталлар. Онон уопуттарыттан үллэстэргэ бэлэмнэрин бэлиэтиибин. Инникитин бу музей өссө кэҥээн, бэйэтэ туспа дьиэлэнэн-уоттанан улахан музей буоларыгар баҕа санаабын тиэрдэбин. Улууска эрэ буолбакка, өрөспүүбүлүкэҕэ тиийэ биллэр-көстөр үлэлээх буоларыгар эрэнэбит» — диэн Михаил Догордуров бэлиэтээтэ.
Саҥа музей сүрүннээччитинэн алын сүhүөх кылаас учуутала Айталина Чичигинарова буолар. Кини:
— «Сир ийэ» эко-музей бырайыага өрөспүүбүлүкэтээҕи бырагырааманан олоххо киирдэ. Бу тус сыаллаах пуонда инники көлүөнэ сайдарыгар бары өттүнэн көмө оҥорор сыаллаах-соруктаах буолар. Онон бу пуондаҕа биhиги махталбыт улахан. Оҕолорбут экология хайысхатыгар араас тэрээhиҥҥэ кыттыахтара, быыстапкалары туруоруохтара. Маны сэргэ сынньалаҥ кэмигэр эко-музейбытыгар кэлэн, араас энциклопедиялары, кинигэлэри көрөн-ааҕаҥ билиилэрин хаҥатыахтара.
«Сир ийэ» бырайыак чэрчитинэн ыытыллыбыт оскуола оҕолоругар туттуллубат, быраҕыллар маллары иккис тыынныыр, тулалыыр эйгэбитин ыраастык тутарга үөрэтэр сыаллаах куонкурус кыайыылаахтарын чиэстээтилэр. Наҕараадалары эбии үөрэхтээhин педагога Алгыстаана Федорова туттарда.
Оскуолабыт иккис этээhин фойета эко-музей буолан, олорон үлэлииргэ, сынньанарга, кинигэ ааҕарга табыгастаах оҥоhуллан, саҥалыы тыннаммытыттан биhиги бары үөрэбит.
Болот Боотур аатынан Хатылы орто оскуолатын 7 «б» медиакылааhа.