Одьулуун нэһилиэгэр «ИДЭҺЭ-2024» Тыа хаһаайыстыбатын күнэ бэлиэтэннэ.
Хороҕор муостааҕы, сыспай сиэллээҕи дэлэтэр үлэһиттэри, бэтэрээннэри Улуус дьаһалтатын, Тыа хаһаайыстыбатын управлениетын уонна нэһилиэк дьаһалтатын туһааннаах салайааччылара үөрүүлээх быһыыга-майгыга эҕэрдэлээтилэр.
Бу тэрээһиҥҥэ түөлбэлэр икки ардыларыгар «Собо ыһаарылааһына» уонна «Баахыла буһарыыта» биир сүрүн дьаһалынан буолла. Эрдэ биллэриллибит балаһыанньанан күрэхтэһээччилэр туттар тэриллэрин, баахыла тиэстэтин оҥорон, балыгы дьиэлэриттэн бэлэмнээн кэлэн, тэрээһин кэмигэр ас бөҕөтүн астаатылар. Түөлбэлэр бары көхтөөхтүк түмсэн, тэрээһин сыала-соруга ситтэ. Нэһилиэк дьоно-сэргэтэ буспут аһы барытын сойутан, хомуйан, Байыаннай дьайыыга сылдьар уолаттарыгар ыытар былааннаахтар.
Ону таһынан, «Дьөһөгөй» түмсүү салайааччыта Николай Сегонович Константинов, сылгы иитиитинэн дьарыктанар дьон сүрдээх үчүгэй этиилэрин киллэрэн, бачыым көтөхпүттэрин олоххо киллэрдилэр. Ол курдук, 2024 сыл тохсунньутуттан сэтинньигэ диэри саҥа оҕоломмут дьиэ кэргэттэргэ анаан тыыннаах убаһаны туттарыы долгутуулаах түгэнэ буолла. Маныаха туһааннаах ыаллартан тарбах талаана быһаарда. Ол түмүгэр игирэ кыргыттарга күн сирин көрдөрбүт эдэр ыал Василена уонна Дмитрий Капитоновтарга дьоллоох түгэн тосхойдо.
Тыа хаһаайыстыбатын бырааһынньыгын биир күүтүүлээх түгэнинэн – нэһилиэк дьаһалтата уонна урбаанньыттар успуонсардаан, босхо сүүйүүлээх бириистэри оонньоттулар.
“Саҥа олох” кэр.