Ньурба улууһуттан сэттэ киһилээх дэлэгээссийэ Чурапчыга кэлэн, Олохтоох көҕүлээһини сайыннарар агентство үлэтин билистилэр.
Көрүсүһүү олус туһалаахтык уонна интэриэһинэйдик ааста. Ол курдук, агентство базатыгар ыытыллыбыт мунньахха кэммиэрчэскэйэ суох тэрилтэлэри кытта үлэҕэ, чуолаан граҥҥа кыттыы тула атах олорон кэпсэттилэр, уопуттарын үллэһиннилэр.
Маны таһынан бу күн кэммиэрчэскэйэ суох тэрилтэлэр бэрэстэбиитэллэрэ федеральнай гранынан ситиһиилээхтик олоххо киирбит социальнай бырайыактарын билиһиннэрдилэр. Кэлбит дэлэгээссийэ сэргээн иһиттилэр, интэриэһиргиир боппуруостарыгар сөптөөх эппиэттэри ылан астыннылар.
Елена Романова, Ньурбаҕа ыччат дьыалатын уонна имидж бэлиитикэтин иһинэн бырайыак үлэтигэр отдел салайааччыта:
— Чурапчы бырайыактара Бэрэсидьиэн гранын хас да төгүл кыайан тураллар. Онон Чурапчыга анаан-минээн кэлэн, кэммиэрчэскэйэ суох тэрилтэлэр үлэлэрин-хамнастарын билистибит. Олоххо киирбит бырайыактар киһиэхэ олус суолталаах социальнай хайысхалаахтарын бэлиэтии көрдүм. Бырайыактарын олус судургутук, үчүгэйдик суруйаллар эбит. Агентство үлэһиттэрин кытта сүрүн боппуруоһунан федеральнай граны ыларга туохха ордук болҕомто уурарга, ханнык хайысхаҕа үлэлиир тоҕоостоох буоларын сэһэргэстибит. Биһиги быйылгы сылга Бэрэсидьиэн гранын пуондатыттан саатар биир бырайыагы ылар сыал туруоруннубут. Онуоха сайдарга сонун идиэйэлэри ыллыбыт. Маны тэҥэ агентствоҕа буҕаалтыр арыаллааһынын уонна дуогабары, устаабы сөпкө оҥорорго, түһэрсэргэ юрист өҥөтө баарын сэҥээрдибит, бэйэбитигэр бэлиэтэннибит. Ону таһынан быйыл тыа хаһаайыстыбатын эйгэтигэр үлэлэһэргэ саҥа билиилэри ыллыбыт. Инникитин да Чурапчытааҕы кэллиэгэлэрбитин кытта бииргэ үлэлэһэ, уопут атастаһа туруохпут диэн эрэнэбит.
Марфа Петрова.