Норуоттар икки ардыларынааҕы научнай-практическай конференция саҕаланна

От ыйын 4 күнүгэр VIII-с норуоттар икки ардыларынааҕы «Азия оҕолоро» оонньуулар итиэннэ Чурапчытааҕы судаарыстыбаннай физическэй култуура уонна спорт института төрүттэммитэ 25 сыллаах бэлиэ даататын чэрчитинэн Дьокуускайга «От Международных спортивных игр «Дети Азии» к университетскому спорту» научнай-практическай конференция саҕаланна. Манна устудьуоннар, аспираннар уонна эдэр учуонайдар кыттыыны ылыахтара. Конференция нуучча, Англия тылларынан ыытыллар.

Дьүүллүүр сүбэ дакылааттары секцияларынан арааран истиэҕэ. Оҕо спордун сайдыытыгар, устудьуоннар ортолоругар спорт теориятыгар уонна практикатыгар, маассабай спорт сайдыытыгар, спорт национальнай көрүҥнэрин эйгэтигэр саҥа кыахтары арыйыыга, инникини торумнааһыҥҥа, аныгы олоххо спорт салаатыгар араас норуоттары кытары биир сөбүлэҥинэн үлэлэһиигэ сыһыаннаах тиэмэлэргэ үлэлэлэр көрүллүөхтэрэ. Конференция от ыйын 7 күнүгэр диэри ыытыллыаҕа. Бу түмүгүнэн бастыҥ үлэлэр научнай хомуурунньукка тиһиллиэхтэрэ, хомуурунньукка Аан дойдуга билиниллэр УДК, ББК индекстэрэ итиэннэ норуоттар икки ардыларынааҕы ISBN бэлиэ иҥэриллиэҕэ.

 

Наталья Сибирякова

Галина Голокова хаартыскалара