Дойдуга “Дьиэ кэргэн” сылын иитинэн А.Г. уонна Н.К. Чиряевтар ааттарынан Дьокуускай куорат национальнай гимназиятын баазатыгар “Ийэм, аҕам уонна мин – ыспартыыбынай дьиэ кэргэн” өрөспүүбүлүкэтээҕи куонкурус-күрэхтэһии дьиҥнээх бырааһынньыга бэҕэһээ о.э ахсынньы 14 күнүгэр буолла. Бэйэлэрин куораттарыгар, улуустарыгар кыайыылаах 13 дьиэ кэргэн кыайыы иһин илин-кэлин түһүстүлэр.
Тэрээһин ыҥырыылаах ыалдьыттарынан СӨ үөрэх уонна наука миниистирин солбуйааччы Юрий Присяжнай, “Юные якутяне” өрөспүүбүлүкэтээҕи ресурснай киин дириэктэрэ Айал Соловьев, өрөспүүбүлүкэтээҕи ыспартыыбынай резевэтин бэлэмниир киин дириэктэрин солбуйааччы Виктор Громов буоллулар.
Дьокуускайдааҕы национальнай гимназия дириэктэрин иитэр үлэҕэ уонна социализацияҕа солбуйааччы Анатолий Чиряев кэлбит ыалдьыттары, кыттааччылары оскуола кэлэктиибин аатыттан эҕэрдэлээтэ. Онтон гимназия үөрэнээччилэрэ бэйэлэрин ылбаҕай ырыаларынан, үҥкүүлэринэн эҕэрдэлээтилэр.
Миниистири солбуйааччы Юрий Михайлович, СӨ үөрэх уонна наука министиэристибэтин аатыттан күрэхтэһиигэ кэлбит дьиэ кэргэттэргэ, кинилэри өйүүр бөлөхтөргө дириҥ махталын биллэрдэ итиэннэ бука бары кыайыылаах, Саха сирин киэн туттар дьиэ кэргэттэрэ буолалларын туһунан эттэ.
Дьиэ кэргэттэн күрэхтэрэ хас даҕаны түһүмэҕинэн ыытылынна, ол курдук: бэйэни билиһиннэрии, миэстэттэн туран эрэ ырааҕы ыстаныы, муостаттан анньыныы, ис былчыҥын хачайдааһын, сыалы табыы, скакалканан ыстаныы, “Эрудит” интеллектуальнай уонна эстафета куонкурустара буоллулар.
Күрэхтэһии кыайыылаахтарын икки бөлөххө арааран быһаардылар.
Бастакы бөлөх түмүгэ
Кыргыттардаах дьиэ кэргэттэр
1 миэстэ — Алдан оройуонун Аллара Куранах бөһүөлэгин “Олененок” уһуйаан, Цветковтар дьиэ кэргэттэрэ;
2 миэстэ — Чурапчы улууһун Соловьев нэһилиэгиттэн Күннэй, Михаил, Кэрэлиинэ Николаевтар дьиэ кэргэттэрэ;
3 миэстэ — Намского улууһун Нам нэһилиэгин 11-с нүөмэрдээх “Сулусчаан” уһуйаан, Охлопковтар дьиэ кэргэттэрэ.
Лауреаттарынан:
Петровтар дьиэ кэргэн Хаҥалас улууһа “Брусничка” уһуйаан;
Петровтар дьиэ кэргэн Дьокуускай куорат 22-с нүөмэрдээх “Жемчужинка” уһуйаан;
Васильевтар дьиэ кэргэн Мэҥэ Хаҥалас улууһун Хара нэһилиэгин “Кэнчээри” уһуйаан.
Иккис бөлөх түмүгэ
Уолаттардаах дьиэ кэргэттэр
1 миэстэ — Караевтар дьиэ кэргэттэрэ, Дьокуускай куорат 16-с нүөмэрдээх “Золотинка” уһуйаан;
2 миэстэ — Андреевтар дьиэ кэргэттэрэ, Ньурба куорат “Светлячок” уһуйаан;
3 миэстэ — Ларионовтар дьиэ кэргэттэрэ, Амма улууһун Эмис нэһилиэгэ “Чуораанчык” уһуйаан.
Лауреаттарынан:
Осиповтар дьиэ кэргэттэрэ, Бүлүү куорат “Алмазик” уһуйаан;
Старостиннар дьиэ кэргэттэрэ, Эбээн Бытантай оройуона;
Сотрудниковтар дьиэ кэргэттэрэ, Уус Алдан улууһун Саһылыктаан нэһилиэгин оскуола-уһуйаана;
Жирковтар дьиэ кэргэттэрэ, Горнай улууһун Бэрдьигэстээх нэһилиэгин “Кэнчээри” уһуйаана.
Манна боротокуолларын даҕаны көрдөххө, биһиги улууспут чиэһин көмүскээбит Күннэй, Михаил уонна Кэрэлиинэ Николаевтар дьиэ кэргэттэрин уопсай бааллара Алдантан кыттыбыт Цветковтар дьиэ кэргэттэрин кытары тэҥнэспит эбит ол онно көрдөххө хаачыстыба өттүгэр кыратык хаалбыппыт. Дьиҥэр биһиги дьоммут эмиэ кыайыылаах буолан тахсаллар.
Сэмэн ЖЕНДРИНСКЭЙ. Николай Гуляев хаартыскаҕа түһэриитэ