ХIХ-ХХ үйэлэр кирбиилэригэр кыахтаах ыаллар уһулуччу баай, уус-уран тыллаахтарынан сураҕырар олоҥхоһуттары бэйэлэригэр ыҥыран ыллатар үгэстэрэ үөдүйэ сылдьыбыта биллэр.
Онтон билиҥҥи олоҥхоһуттарга анаан бэйэ-бэйэлэрин истиһэр, уопут атастаһар бэртээхэй түһүлгэлэрэ тэриллэр. Ырыа-тойук, олоҥхо үтүө үгэстэригэр бигэнэн улааппыт Былатыан Ойуунускай эмиэ итинник олоҥхо киэһэлэрин тэрийэрин туһунан устуоруйа чахчылара кэрэһилииллэр.
“СӨ Олоҥхо ассоциацията, Таатта улууһун норуот айымньытын дьиэтэ, Тааттатааҕы олоҥхо филиала, Л.Н. Турнин аатынан Тыараһатааҕы норуот айымньытын дьиэтэ, П.А. Ойуунускай аатынан литературнай түмэл Сардаана Ойунская төрөөбүтэ 90 сылыгар аналлаах “Хомуур олоҥхо” түһүлгэтин тэрийээри сылдьабыт, — диэн иһитиннэрэр литература түмэлин үлэһитэ Ньургуйаана Халгаева. – Ахсынньы 13 күнүгэр сарсыарда 10.30 чаастан Былатыан Ойуунускай «Дьулуруйар Ньургун Боотур» сүдү айымньытын тоҕус ырыатын ааттаах-суоллаах олоҥхону толорооччулар толоруохтара: I ырыатын Петр Тихонов (Мэҥэ Хаҥалас улууһа), II ырыатын Александр Багардынов (Таатта улууһа), III ырыатын Петр Тихонов, IV ырыатын Афанасий Попов (Таатта улууһа), V ырыатын быйылгы Олоҥхо ыһыаҕын муҥутуур кыайыылааҕа Анатолий Христофоров (Чурапчы улууһа, Соловьев нэһилиэгэ), VI ырыатын Яна Ньургусова (Нам улууһа), VII-VIII-IХ ырыалары Алексей Николаев (Таатта улууһа)”.
Сэмэн ЖЕНДРИНСКЭЙ