Ааспыт өрөбүллэргэ Мугудай нэһилиэгэр «Тура» крестьянскай-фермерскэй хаһаайыстыба тэриллибитэ 30 сылынан салайааччы Варвара Сивцева өр сылларга алтыһан үлэлии сылдьар бука бары дьонун-сэргэтин, аймахтарын, бааһынай хаһаайыстыба салайааччыларын, улуустааҕы тыа хаһаайыстыбатын управлениетын, «Чурапчы» ТХПК салалталарын, үлэһиттэрин ыҥыран бэлиэтээтэ. Кэлбит ыалдьыттары минньигэс алаадьынан, саламаатынан, саха амтаннаах аһынан күндүлээн көрүстүлэр.
«Тура» 1994 сыллаахха тэриллиэҕиттэн олох хардыытынан тэҥҥэ сайдан хороҕор муостааҕы хорҕотон, сыспай сиэллээҕи сириэдитэн, үрүҥ илгэни үрүлүтэн, эти-аһы дэлэтэн бүгүн күҥҥэ диэри таһаарыылаахтык үлэлээн кэллэ. Бу сыллар тухары өрөспүүбүлүкэттэн да, федеральнай да үптэн көрүллэр субсидияларынан туһанан материальнай-техническэй базатын хаҥатта, тупсарда, иитэр төбөтүн да үксэтэргэ үлэлэстэ.
Дьоро күн үөрүүлээх чааһын Ил Дархан стипендиата Николай Григорьев алгыһынан, тойугунан арыйда. Варвара Михайловна дьонун-сэргэтин иннигэр кылгастык хаһаайыстыба аан бастаан төрүттэнэригэр, атаҕар турарыгар ким күүс-көмө буолбутун, баччаҕа диэри хайдах быһыылаахтык үлэ-хамнас ыытыллыбытын кэпсээтэ, куруук өйөбүл буолар дьонугар ис сүрэҕиттэн махтанан туран Махтал суруктары, бэлэхтэри туттарда. Улуустааҕы тыа хаһаайыстыбатын управлениетын салайааччыта Анжелика Неустроева эҕэрдэ тылын анаата, тыа хаһаайыстыбатын эйгэтигэр уһулуччу кылааттарын иһин хаһаайыстыба салайааччытыгар, үлэһиттэригэр наҕараадалары туттарда. Маны тэҥэ истиҥ эҕэрдэ тылларын «Чурапчы» ТХПК дириэктэрэ Николай Петров, уһун кэмҥэ биир эйгэҕэ үлэлии-хамсыы сылдьар хаһаайыстыбалар салайааччылара эттилэр.
Үөрүүлээх чаас кэннэ олус интэриэһинэй эр дьоҥҥо «Эстибэт эрэттэр, хоһуун хотойдор», дьахталларга «Сайылык хоһуун далбара» уонна эдэрдэргэ «Тура Баатыр» тус-туһунан күрэхтэр ыытылыннылар. Бэлиэтээн эттэххэ, бу эр дьоҥҥо уонна дьахталларга ыытыллыбыт күрэхтэр кылаан кыайыылаахтара Чакыртан Иван Ануфриев уонна Улахан Күөлтэн Эльза Макарова «Тура» хаһаайыстыба туруорбут убаһатынан уонна ньирэйинэн наҕараадаланнылар уонна миэстэлэспит бары кыттааччылар Варвара Михайловна бииргэ төрөөбүттэрэ, аймахтара спонсордаабыт бириистэрин туттулар.
Бука бары оонньууну оройуттан тутан, биир эйгэ үлэһиттэрэ истиҥник көрсөн-кэпсэтэн, саха мааны аһынан күндүлэнэн бу тэрээһинтэн сүргэлэрэ көтөҕүллэн, дуоһуйан тарҕастылар.
Наталья Сибирякова