Саха Өрөспүүбүлүкэтин судаарыстыбаннай былааһын ситэриилээх уорганнарын 2024 сыллааҕы үлэлэрин отчуоттуур үһүс бөлөҕө бүгүн сарсыарда 11 чааһы ааһыыта Мугудай нэһилиэгиттэн саҕалаата. Мунньахха 86 киһи сырытта.
Отчуоттуур бөлөх салайааччытынан СӨ тырааныспарга уонна суол хаһаайыстыбатыгар миниистирин солбуйааччы Семен Коркин буолла. Кинини сэргэ СӨ үлэҕэ уонна социальнай сайдыыга миниистирин солбуйааччы Иннокентий Коротких, СӨ тутууга миниистирин солбуйааччы Александр Баланов, СӨ нэһилиэнньэ дьарыктаах буолуутугар судаарыстыбаннай кэмитиэт бэрэссэдээтэлин солбуйааччы Георгий Борисов, СӨ доруобуйа харыстабылын министиэристибэтин иһинээҕи ресурснай киин Саха Өрөспүүбүлүкэтин судаарыстыбаннай казеннай тэрилтэтин дириэктэрэ Альберт Жирков, СӨ дьиэ-уот хомунаалынай хаһаайыстыбата судаарыстыбаннай унитарнай тэрилтэ оҥорон таһаарар тиэхэньическэй салаа отделын начаалынньыга Федот Дыдырысов кыттыыны ыллылар.
СӨ Бырабыыталыстыбатын иннигэр мугудайдар номнуо 25-с сылларын ОДьКХ ГУТ көрүүтүгэр баар хочуолунайы саҥардарга туруорсаллар. Онуоха баһылык Николай Аммосов хочуолунай тутуутун түргэтэргэ диэн ис хоһоонноох икки суругу СӨ Бырабыыталыстыбатын бэрэссэдээтэлин 1-кы солбуйааччы Дьулустан Борисовка анаан күн-сарсын туттарарын туһунан иһитиннэрдэ. Отчуот кэнниттэн хочуолунай уопсай туругун Бырабыыталыстыба отчуоттуур бөлөҕөр өссө төгүл көрдөрдө.
Маны таһынан олохтоохтору, ханна да буоларын курдук, тыа сиригэр эдэр ыччаты олохсутуу кыһалҕата долгутар. Ыччат дьон нэһилиэктэн киин сиргэ көһөллөрө баар суол. Маны тохтоторго ханнык суолу тобулуохха сөбүгэр санааларын эттилэр.
Нэһилиэнньэттэн олус элбэх ыйытыы киирэн эппиэттэннэ. Ол иһигэр тыа хаһаайыстыбатыгар итиэннэ үөрэх салаатыттан исписэлиистэр суохтара улаханнык атахтаата. Гааһы киллэриигэ, “Абалаах” санаторийы чөлүгэр түһэриигэ, сыананы хонтуруоллааһыҥҥа, саҥа уһуйааны тутууга, үүтү туттарыы ирдэбиллэрин судургутууга, нэһилиэккэ баһаарынай чааһы тэрийии, олохтоох бүддьүөтү үрдэтии, таас дьиэлэр тутуллууларын хонтуруолга ылыы о.д.а.
Нэһилиэнньэ ыйыппыт боппуруостарыгар төһө даҕаны ситэтэ суох эппиэттэри ылбыттарын үрдүнэн, СӨ Бырабыыталыстыбатын үлэтин 100 бырыһыан сөптөөҕүнэн сыаналаатылар.
Төлөйгө
Төлөйгө бу сырыыга отчуоту истэ, 58 киһи кэллэ, былырыыҥҥыттан икки киһинэн эбиллибит.
Отчуот иннинэ, “Улуу кыайыы 80 сылыгар” аналлаах үбүлүөйүнэй мэтээли тыыл бэтэрээнигэр, быйыл сэтинньи 24 күнүгэр 100 сааһын туолуохтаах Варвара Петровна Захарова аймахтарыгар туттардылар, итиэннэ СӨ тыатын хаһаайыстыбатын миниистирин махтал суруктарынан урбаанньыт Дария Потапова уонна Мотрена Смирникова наҕараадаланнылар. Семен Николаевич дакылаатын кэнниттэн нэһилиэк олохтоохторо араас кыһалҕалаах боппуруостарын биэрдилэр, тус санааларын, этиилэрин киллэрдилэр. Ол курдук, оскуола хапыталыынай өрөмүөнүн түргэтэтиигэ, учуобунньуктары ылыыга эбии үп көрүллүүтэ, оттук уонна уот сыаналара хонтуруолланыытыгар, успуорт саала тутуллуутун, хочуолунай оһоҕун хайаан даҕаны уларытарга, Төлөй, Мугудай нэһилиэктэригэр гаас ситимэ тардыллыытын, дьаһалта үлэһиттэрин хамнаһын үрдэтиигэ, оҕуһу атыылаһан иитиигэ эбии көмө көрүллүүтүгэр, элбэх оҕолоохторго көрүллэр көмө, икки ыалга ититии киириитин туһунан о.д.а. туһааннаах ыйытыыларын биэрдилэр.
Манна сүрүн кыһалҕалаах боппуруостарынан оскуола хапытаалынай өрөмүөнэ, бэдэрээлинэй тыраассаттан суолу аспааллааһын буолла. Хочуолунай оһоҕун хайаан даҕаны уларытарга итиэннэ эрдэ таһыллан умайбыт чоххо перерасчету хат ааҕан биэрэллэригэр этии киллэрдилэр, сыана аһары үрдээн гөрүүчэйгэ итиэннэ хомунаалынай төлөбүрэ мунчаардарын эттилэр.
Отчуоту истэн бараннар, Семен Коркин Төлөй нэһилиэгэр инники сылларыгар, успуорт хайысхатыгар тиийэ көмөтүн ону таһынан министиэристибэттэн кэлбит Федот Дыдырысов, ититии систиэмэтин бырайыагар көмөлөһөн билигин Төлөй 98 бырыһыан ититиигэ холбонон олороругар махтанан тураннар олохтоохтор өрөспүүбүлүкэ үрдүкү салалтатын ааспыт сыллааҕы үлэтин сөптөөҕүнэн сыаналаатылар.
Сэмэн ЖЕНДРИНСКЭЙ. Ааптар хаартыскаҕа түһэриитэ