Чурапчыга «Айылгы» норуот айымньытын дьиэтигэр устудьуоннар икки ардыларыгар «Мисс ЧГИФКиС-2024» кэрэ көстүү уонна талаан куонкуруһа ыытылынна. Быйылгы күрэх Чурапчытааҕы спорт үнүстүүт тэриллибитэ 25 сылыгар ананна.
«Бу тэрээһиммит уратыта диэн аһымал хабааннаах. Ол курдук, аҕам саастаах дьоммутун ыам ыйын бырааһынньыктарынан эҕэрдэлээн, киирбит үптэн ас-үөл атыылаһан түҥэтиэхпит. Маннык үтүө дьыала саҕаламмыта үһүс сыла буолар. Онон кыттааччы кэрэ куоларбытыгар сырдык холобур буолар. Маны таһынан куонкурус кыргыттар дьоҕурдарын, талааннарын арыйалларыгар, бэйэлэригэр эрэллээх, сыанаттан толлубат буолалларыгар көмөлөһөр«, — диэн тэрээһини иилээн-саҕалаан ыытар тэрийээччи Илона Обутова бэлиэтээтэ.
Бу куонкуруска алта кыыс кытынна. Бастакы түһүмэххэ национальнай таҥастарын кэтэн бэйэлэрин билиһиннэрдилэр. Иккис түһүмэххэ уоттаах-күөстээх, тэтимнээх латиноамериканскай үҥкүүнү толордулар. Салгыы үһүс түһүмэххэ талба талааннарын көрдөрдүлэр. Кырдьыга даҕаны кыргыттар бары – олус дьоҕурдаахтар. Хас биирдии нүөмэри «ыалдьааччылар” ытыс доҕуһуолунан, күргүөмнээх хаһыынан көрүстүлэр. Бүтэһик түһүмэҕинэн киэһээҥҥи былааччыйалары көрүү буолла.
Тыҥааһыннаах куонкурус түмүгүнэн кыттааччылар бары анал ааттарга тигистилэр. Ол курдук, кыттааччылар куоластааһыннарынан «Мисс Дружба” анал ааты Алла Аянитова ылла. Маны сэргэ кини көрөөччүлэр биһирэбиллэрин ылыан ылан, «Мисс Зрительский симпатий» аат хаһаайкатынан буолла. Эрдэ ЧГФКСИ саалыгар биэс көрүҥҥэ ыытыллыбыт күрэхтэһии кыайыылааҕынан Александра Степанова буолан, «Мисс Спорт» анал аатынан итиэнэ үнүстүүт үбүлүөйдээх мэтээлинэн наҕараадаланна. Салгыы «Мисс национальное достояние” анал ааты ылла. Телеграм-канал нөҥүө ыытыллыбыт аһаҕас куоластааһын түмүгүнэн Валерия Захарова «Мисс Интернет” аат хаһаайкатынан буолла. Ону тэҥэ «Мисс Грация» ааты ылла. Оттон «Мисс Талант» анал ааты Селена Степанова, «Мисс фото” анал ааты Диана Гоголева ыллылар.
Бары түһүмэхтэргэ чаҕылхайдык кыттан, «I вице Мисс ЧГИФКиС-2024» Алла Аянитоваҕа, «II вице Мисс ЧГИФКиС-2024» Саина Румянцеваҕа иҥэрилиннилэр. Муҥутуур кыайыылааҕынан, «Мисс ЧГИФКиС-2024» үрдүк аат хаһаайкатынан Диана Гоголева ааттанна.
Диана Уус Алдан улууһуттан сылдьар үнүстүүт 2-с кууруһун устудьуона. Кини волейболунан сөбүлээн дьарыктанар эбит.
«Маннык улахан куонкуруска аан бастакыбын кытынным. Ол иһин бэйэни билиһиннэрии түһүмэҕэ миэхэ ордук ыарахан буолла. Онтон атын түһүмэхтэр олус түргэнник ааһан, долгуйбуппун да, билбэккэ хааллым. Бары көмөлөспүт чугас дьоммор, аймахтарбар, бииргэ үөрэнэр оҕолорбор, доҕотторбор, кураторбар махталбын тиэрдэбин”, — диэн куонкурус кыайыылааҕа үөрүүтүн үллэһиннэ.
Марфа Петрова.