Михаил Гуляев: Өрөспүүбүлүкэбит инники сайдыытыгар суолталаах түгэн буолла

Чурапчытааҕы государственнай физкультура уонна спорт институтун бэрэсидьиэнэ Михаил Гуляев Саха сиригэр Владимир Путин сырыытын туһунан санаатын үллэһиннэ:
— Дойду Бэрэсидьиэнэ Владимир Путин Саха сиригэр кэлбитэ улахан суолталаах түгэн буолар. Уопсастыбаннаһы кытта көрсүһэн бары боппуруостарга сиһилии хоруйдаата. Ол курдук хоту үлэлээбит «надбавка» НДФЛ-га учуоттаныа суохтааҕын сөпсөстө, өйүүрүн биллэрдэ уонна бырабыыталыстыбаҕа сорудах биэриэх буолла. Бу — өр сылларга туруоруллубут боппуруос. Бүтүн саха сирин дьонун-сэргэтин хамнаһын боппуруоһа быһаарыллар буолбута олус үчүгэй. Маны таһынан эбии үөрэхтээһиҥҥэ хамнаһы эбэр боппуруоһу өйөөбүтэ киһини үөрдэр. Биир тыын боппуруоспут, Өлүөнэ эбэни туоруур муоста тутуллуоҕа диэн эрэннэрбититтэн үөрэбит.
Владимир Владимирович маастар-былааны билистэ. Ол эбэтэр 2030 сылга диэри Дьокуускай куорат олохтоохторун хаарбах дьиэттэн көһүүлэрин былаанын сэҥээрдэ уонна өйөөтө. Снайперга уһуйар тиргэ сылдьан үлэни-хамнаһы биһирээтэ. Патриотическай иитиигэ Саха сирэ киэҥ хабааннаах үлэни оҥоро олорорун бэлиэтээтэ, салгыы маннык таһымнаахтык ыытылларын биһириирин биллэрдэ.

Людмила Горохова.