2022 сыл балаҕан ыйын 22 күнүгэр, Чурапчы улууһун дьаһалтатын көҕүлээһининэн оройуоҥҥа Виталий Вонгродскай аатынан Дьокуускайдааҕы медицинскэй кэллиэс Чурапчытааҕы отделение арыллан медик буолуон баҕалаах устудьуоннары “эмтиир дьыалаларга” уонна “сиэстэрэ дьыалаларыгар” үөрэтэн саҕалаабыта.
“Билигин барыта холбоон 46 устудьуон үөрэнэ сылдьар. Бүгүн кинилэргэ фармакология предметигэр бастакы эксээмэннэрэ. Предмети сыл устата, СӨ, РФ доруобуйатын харыстабылын туйгуна, үрдүкү категориялаах эндокринолог-быраас кабинетнай сиэстэрэтэ, биолог идэлээх Прасковья Доровеева үөрэтэн кэллэ. Бу предмеккэ устудьуоннар ханнык эмп-том киһи организмыгар хайдах дьайарын, ырысыабы сөпкө суруйууга итиэннэ эмп састаабы билэ үөрэнэллэр. Биһиги устудьуоннарбыт наһаа маладьыастар, үөрэхтэригэр олуһун кыһаллаллар, эксээмэннэрин бука бары ситиһиилээхтик туттаралларыгар баҕарабын”, — диэн В.А. Вонгордскай аатынан Дьокуускайдааҕы медицинскэй кэллиэс Чурапчытааҕы отделениетын сэбиэдиссэйэ, СӨ уонна РФ доруобуйатын харыстабылын туйгуна, бука бары убаастыыр бырааспыт Александра Васильевна Седалищева кэпсээтэ.
Чурапчыга үөрэнэ сылдьар устудьуоннар үөрэхтэрин бүтэрдэхтэринэ син биир Дьокуускай куорат выпускниктарын курдук анал орто үөрэҕи бүтэрбиттэрин туоһулуур ситии-хотуу дипломнарын ылыахтара.
“Бэйэбит улууспутугар үөрэхтэрин бүтэрбит устудьуоннар балыыһабыт орто медицинскэй састаабын хаҥатыахтара, ону таһынан оскуоланы бүтэрбит эбэтэр урут-уруккуттан медик идэлэниэн баҕалаах дьоҥҥо хаана даҕаны ырааппакка үөрэнэллэригэр табыгастаах усулуобуйа тэрилиннэ”, — диэн Прокопий Сокольников аатынан Чурапчытааҕы киин балыыһа кылаабынай бырааһа Николай Сивцев санаатын үллэһиннэ.
Сэмэн Жендринскэй