Сылгы иитиитэ сахаларга биир сүрүн уонна төрүт салаа буолар. Мээнэҕэ саханы Күн Дьөһөгөй Айыы таҥаралаах норуот диэхтэрэ дуо?! Былыр-былыргыттан саха олоҕун укулаата, ону кытта култуурата, үгэстэрэ Дьөһөгөй оҕотун кытта ыкса ситимнээхтэр. Ол курдук сылгыны иитии норуоппут төрүт үгэһинэн буолар. Сылгы уонна сылгыһыт, саха норуотун дьылҕатыгар уһулуччу суолтатын бэлиэтээн, 2016 сыллаахха оччотооҕуга СӨ Ил Дархана Егор Борисов анал ыйааҕынан кулун тутар 21 күнүн Сылгыһыт күнүнэн биллэриллибитэ.
Ахсыс төгүлүн улууска ыытыллар тэрээһиҥҥэ “Чурапчы улууһа” МО баһылыгын 1-кы солбуйааччы Рустам Данилов, улуус баһылыгын тыа хаһаайыстыбатын боппуруостарыгар солбуйааччы Анжелика Неустроева, “Төлөй нэһилиэгэ” тыа сирин түөлбэтин баһылыга Игорь Николаев, Сылаҥ нэһилиэгиттэн күрэхтэһии сүрүн судьуйата Семен Ноговицын кыттыыны ыллылар. Бу күн сылгыһыттар күрэхтэрэ, 1200 миэтэрэҕэ ат сүүрдүүтэ, эр дьоҥҥо хаатыҥка быраҕыыта, эр дьоҥҥо уонна дьахталларга тоҥуу хаарынан сүүрүү, босхо эбиэт, атыы-эргиэн дьаарбаҥката тэрилиннилэр.
Сылгыһыттар күрэхтэригэр Болтоҥо, Одьулуун, Хоптоҕо (икки хамаанда) нэһилиэктэриттэн хамаандалар илин-кэлин түһүстүлэр.
Манна былырыыҥҥы кыайыылаах Хоптоҕо нэһилиэгин 1-кы хамаандата 7 мүнүүтэ 53 сөкүүндэни (былырыыҥҥыта 8 мүн. 5 сөк) бириэмэни көрдөрөн 1 миэстэ буолары ситистэ уонна кулун тутар 21-22 күннэригэр Мэҥэ Хаҥалас улууһун Майа сэлиэнньэтигэр ыытыллар сылгыһыттан өрөспүүбүлүкэтээҕи күөн күрэстэригэр кытта барар путевканы, айан ороскуотун толуйар 1 туонна гөрүүчэйгэ сэртэпикээтинэн наҕараадаланнылар. Иккис миэстэ буолбут Одьулуун нэһилиэгин хамаандата (8 мүн. 37 сөк) – 30 куул эбиэһи итиэннэ үһүс миэстэҕэ тиксибит Хоптоҕо нэһилиэгин иккис хамаандата (9 мүн. 50 сөк) – 15 куул эбиэһи тиэнэн бардылар.
Манна улууска аан бастакытын эр дьоҥҥо уонна дьахталларга тоҥуу хаарынан сүүрүүгэ күрэх ыытылынна,
манна эр дьоҥҥо 1-кы миэстэни Болтоҥо нэһилиэгиттэн Василий Колыгин,
дьахталларга 1-с миэстэ – Кытаанах нэһилиэгиттэн Айыына Куо Захарова кыайыылаах тахсаннар сыаналаах бириистэринэн наҕараадаланнылар.
Оттон эр дьоҥҥо хаатыҥканы быраҕыыга Одьулуун нэһилиэгиттэн Сергей Петров аҥардастыы кыайан улаханнык үөрдэ-көттө.
Ат сүүрүүтүгэр, 1200 миэтэрэҕэ барыта холбоон түөрт ат түстэ: Болтоҥоттон Кустук, Чурапчы нэһилиэгиттэн Ыллык, Хабылык уонна Саһарҕа, биэтэккэ Ыллык (1 мүн.40 сөк) кэлэн кыайыылаах үрдүк аатын ылла, сүүрдээччинэн Нам улууһуттан төрүттээх ЧГИФКиС устудьуона Саргылаана Емельянова буолар.
Сылгыһыттан күрэхтэрин хас биирдии түһүмэхтэрин улуус дьаһалтатын успуорка управлениетын уонна Вячеслав Карпов аатынан Чурапчы улууһун оҕо-ыччат ыспартыыбынай оскуолатын үлэһиттэрэ Альберт Собакин, Александр Диодоров, Владимир Кривошапкин, Арсен Макаров хонтуруоллаатылар, үлэлээтилэр.
Томороон тымныыттан, өҥүрүҥ куйаастан толлубакка, сыралаах, сындылҕаннаах, ыарахан үлэҕэ сылдьар тулуурдаах, хорсун сылгыһыттарбытыгар ситиһиилээх үлэни, чэгиэн туругу баҕарабыт. Сыралаах үлэҕит үтүө түмүктээх эрэ буоллун!
Сэмэн ЖЕНДРИНСКЭЙ. Ааптар хаартыскаҕа түһэриитэ