Кытаанах, Хадаар, Чурапчы нэһилиэктэрэ грейдердэринэн хааччылыннылар

Бүгүн, бэс ыйын 27 күнүгэр ааспыт сыл түмүгүнэн Чурапчы улууһун нэһилиэктэрин икки ардыларыгар ыытыллыбыт комплекснай спартакиада кыайыылаах нэһилиэктэригэр суолу көннөрөр грейдердэри үөрүүлээх түгэҥҥэ туттардыдар.

Ол курдук, социальнай-экономическай сайдыыга үчүгэй көрдөрүүлээх, кыайыылаах нэһилиэктэринэн Кытаанах, Хадаар уонна Чурапчы нэһилиэгэ ааттаммыттара.

“Урукку сылларга нэһилиэктэр икки ардыларыгар ыытыллар комплекснай спартакиада кыайыылаахтарыгар үбүнэн-харчынан биэрэр эбит буоллахпытына, быйыл дьоммут-сэргэбит оҥоһуулаах, тупсаҕай суолунан айанныылларыгар,  суол хаһаайыстыбатыгар олус наадалаах тиэхиньикэлэри туттардыбыт. Ол курдук, суолу көннөрөр грейдердэри анаатыбыт. Нэһилиэктэр ис суолларын көннөрөллөрүгэр бу туһалаах тиэхиньикэ буолар. Инникитин да нэһилиэктэрбит сайдыыларыгар кэскиллээх хамсааһыннары оҥоруохпут диэн былаанныыбыт”, — диэн улуус баһылыга Степан Саргыдаев үллэстэр.

Людмила Горохова, ааптар хаартыскаҕа түһэриитэ, видеоҕа устуута.