Чыаппара бөһүөлэгин арҕаа халдьаайытын үрдүгэр кырамахтаах хара саһылы иитэр ферма 1980 сылга олохсуйбута уонча сыл буолбут этэ. Кэлин кини кэҥэтиллэн саҥардыллыбыта.
Манна үлэлиир кыракый кэлэктиип 1979 сылга 96 ийэ саһылтан хас биирдиилэриттэн ортотунан 3,36 оҕону тыыннаах иитэн оройуон чөмпүйүөнүн үрдүк аатын ылбыта. Кырамахтаахтары иитээччилэр дойду валютнай пуондугар 4 сылга 167,758 солк. күндү түүлээҕи туттаран, пятилеткатааҕы сорудахтарын 105,7 бырыһыан толорбуттарын туһунан рапордаабыттара.
Итинэн пятилетка түмүктээһиннээх сылыгар үктэниэхтээх уон биирис пятилетка суотугар көхтөөх үлэ саҕаламмыта. Кэлэктиип хас биирдии ийэ саһылтан 3,2 оҕону ыларга сорук туруоруммута. Ити кирбиини ылар иһин дьулуурдаах үлэ эмиэ үчүгэй түмүктээх буолбута: барыта 352 оҕону ылбыттара.
Кэлэктиип ити ситиһиилэригэр Петр Николаевич Решетников дьоһун кылааты киллэрсибитэ. Кини көдьүүс уонна хаачыстыба пятилеткатыгар барыта 414 саһыл оҕотун ииппитэ. Ити былааҥҥа көрүллүбүттээҕэр 114-нэн элбэх этэ. Петр Николаевич сыл ахсын биир ийэ саһылтан ортотунан 3,76 төрүөҕү ылан кэлбитэ. Оттон 1980 түмүктээһиннээх сылга, сыһыарыллыбыт 25 ийэ саһылыттан 99 оҕону ылан тыыннаах иитэн туруорбута.
Хомуньуус Петр Решетников норуодунай хонтуруол бөлөҕүн бэрэссэдээтэлинэн быыбарданан бу эппиэттээх эбээһинэһи толорууга актыыбы түмэ тарпыта. Ол курдук, ити дьыл норуодунай хонтуруоллааччылар сопхуос отделениетын отун барытын кэрийэн, мээрэйдээн чуолкайдаабыттара. Ону тэҥэ Карл Маркс аатынан сопхуос кыстыкка ылыммыт эбэһээтэлистибэтин олоххо киллэриигэ тэрийэр үлэҕэ хонтуруолу күүһүрдүбүттэрэ. Чуолаан, Бахсы ыанньыксыттара ынаҕы үстэ ыаһыҥҥа киириилэригэр, үүтү ылыы уонна ыччат сүөһүнү төлөһүтүү сорудахтарын аһары толорууларыгар бөлөх элбэхтик көмөлөспүтэ.
Петр Николаевич бастыҥ үлэһит эрэ буолбатах этэ. Кини сопхуос парткомун чилиэнин, сыахтааҕы партийнай тэрилтэ сэкирэтээрин солбуйааччы быһыытынан производствоҕа хомуньуустар оруолларын үрдэтиигэ, политическай-иитэр үлэни тэрийиигэ куруук кыһанара, көмөлөһө сылдьара.
Карл Маркс аатынан сопхуос партийнай тэрилтэ ити дьыл отчуоттуур-быыбардыыр мунньаҕар килиэккэлээх кыылы иитиини салгыы сайыннарар, хаһаайыстыба биир барыстаах салаатынан оҥорор туһунан киэҥ кэпсэтии буолбуттааҕа. Ити соругу тула кэлэктииби түмүүгэ XXVI оройуоннааҕы партийнай кэмпириэнсийэ дэлэгээтэ Петр Николаевич Решетников элбэх үлэни ыытара.
Сэмэн Жендринскэй