Бэҕэһээ Степан Макаров аатынан Чурапчы гимназиятыгар “Күн” оҕо хамсааһынын оҕолорун кытта көрсүһүү буолла. Чурапчы улууһун 6 үөрэҕин кыһатыттан үөрэнээччилэр кытыннылар (Степан Макаров аатынан Чурапчы гимназиятыттан, Семен Новгородов, Иван Павлов ааттарынан Чурапчы, Гаврил Протодьяконов аатынан Алаҕар, Василий Соловьев-Болот Боотур аатынан Хатылы уонна Төлөй орто оскуолаларыттан).
Көрсүһүү чэрчитинэн “Сахам тыла – мин кутум биһигэ” бэйэни билиһиннэрии, төрөөбүт тыл туһунан аһаҕас кэпсэтии, “Ийэ тылым туһугар мин кэскиллээх хардыыларым” былаанныыр сиэссийэ буолла. Оҕолор хамаандаҕа арахсан “Күн” хамсааһыны улууска тэрийии, сайыннарыы туһунан бырайыактары толкуйдаатылар. Ол кэмҥэ педагогтар төгүрүк остуолга кыттан, эмиэ суолталаах кэпсэтии таҕыста.
“Сахабыт тылын дьылҕатыгар долгуйар оҕолор мустубуттар” диэн сэргии көрдүбүт.Төрөөбүт тылы үйэтитэр суоллары тобулар сыаллаах араас сонун этиилэри иһитиннэрдилэр, көрүүлэри үллэһиннилэр. Биһиги кинилэри кытта сэһэргэстибит:
Ариан Максимов, Николай Субуруускай аатынан Болтоҥо орто оскуолатын 8 кылааһын үөрэнээччитэ:
- Олус үчүгэй тэрээһин буолла. Бу манна биһиги сахалыы тылбыт симэлийэн хаалбатын туһугар арааһынай бырайыактары толкуйдаатыбыт. Элбэх оҕону кытта билсистим. Сонун тэрээһини оҥорбут, салайбыт дьоҥҥо махтал! Билиҥҥи үйэҕэ, хомойуох иһин, сахабыт тыла симэлийэр кутталлаах. Ол иһин биһиги бырайыактарбыт олоххо киириэхтэрэ, көмө буолуохтара диэн эрэнэбин.
АлинаТургунбекова, Семен Новгородов аатынан Чурапчы орто оскуолатын 10 кылааһын үөрэнэччитэ:
– Мин санаабар, сахабыт тылыгар, бу курдук салгыы сүүрэн-көтөн диэбиккэ диэри, араас тэрээһиннэринэн дьон болҕомтотун тардыахха сөп. Бүгүн оҕолор оруннаах санаалары эттилэр. Холобура, сахалыы тылбаастаммыт ойуулуктары оҥоруохха, сахалыы оонньуулары уонна кылаас чаастары тэрийиэххэ диэтилэр.
Юлия Пестерева, өрөспүүбүлүкэтээҕи лиссиэй-интэринээт 11 кылааһын үөрэнээччитэ:
– «Күн» оҕолорго анаммыт хамсааһынынан буолар. Оҕолор бэйэлэрин тылларын,Саха норуотун быһыытынан хантан кэлбиттэрин үчүгэйдик билиэн баҕарар буоллахтарына, нууччалыы эрэ саҥарар оҕолор улаатан бараннар «аата-суола суох, сүппүт киһи» буолбаттарын туһугар үлэлэһиэн баҕарар биир саастыылаахтарбытын «Күн» түмсүүгэ ынырабыт!
Дима Чепалов, өрөспүүбүлүкэтээҕи лиссиэй-интэринээт 10 кылааһын үөрэнээччитэ:
– Бүгүҥҥү тэрээһин эмискэтик тэрилиннэ, ол да буоллар барыта этэҥҥэ, наһаа үчүгэйдик ааста. Элбэх сонун санаалардаах оҕолор кэлбиттэр.»Күн» түмсүүбүт салгыы сайдан иһиэҕэ диэн эрэнэбин. Чурапчы оҕолорун атын харахпынан көрдүм,бары олус көхтөөх эбиттэр. Хамаандаларга арахсан, үчүгэй баҕайытык кытыннылар.
Түмүккэ улууска “Күн” хамсааһыны тэрийэр, сайыннарар былаанын ылыныы, бу хамсааһыны салайсар, көҕүлүүр үөрэнээччилэри, педагогтары талыы буолла. Бүгүҥҥү көрсүһүүгэ кэлбит оҕолор бары “Күн” хамсааһыҥҥа киирдилэр. Ону таһынан Чурапчы улууһун учууталларын “Күн” хамсааһына тэриллэн, эмиэ бырайыак ылылынна. Бу бырайыак төрөппүккэ туһуланар үлэни ыытыаҕа.
Арина Сотникова, Степан Макаров аатынан Чурапчы гимназията 10 “а” кылааһын үөрэнээччитэ,
“Тумус кыһа” пресс-киин.
Бэлэмнээтэ Сэмэн Жендринскэй.