Эрилик Эристиин аатынан колхуос 2-с нүөмэрдээх Мэлдьэхситээҕи биригээдэтин Таппалаах ыччат-комсомольскай ферматыгар комсомолка Матрена Филиппова, 1968 сыллаахха онус кылааһы бүтэриэҕиттэн ыла, тутатына ыанньыксыттыы тахсыбыта.
Кини сүөһү үлэтигэр эрдэттэн үлэлээбэт буолан, бастаан утаа, үлэтин олуһун ыарырҕатара. Ол эрээри, үлэҕэ сыстаҕас кыыс түргэнник үөрэммитэ уонна үчүгэй түмүгү ситиһэргэ сорук туруорунан үлэлээбитэ. Кини үлэҕэ дьулуура уонна ситиһиигэ баҕата күнтэн күн улаатан испитэ. Онон Матрена сүөһүлэрин аһатыыны-сиэтиини тупсарбыта, кырдьаҕас ыанньыксыттар үтүө сүбэлэрин ылынара. Ол барыта кини үлэтигэр үчүгэй түмүктээх буолуутугар тиэрпиттэрэ.
1968 сыллаахха биир фуражнай ынахтан 1300 киилэ үүтү ыырын оннугар 2060 киилэни ыан оройуон үрдүк көрдөрүүлээх ыанньыксыттарын ахсааныгар киирсибитэ. Сыл устата кини аата оройуоннааҕы Бочуот дуоскатыгар үгүстүк тахсыбыта. Матрена Романовна 1969 сыллаахха биир ынахтан 2000 киилэ үүтү ыырга эбэһээтэлистибэлэнэн үлэлээбитэ. Ити үлэтин кини олус үчүгэйдик ыыппыта. Ол курдук, ити сыл икки ыйдарыгар валовойунан 1310 киилэ былааннааҕын 1958 киилэнэн толорбута.
Үүнэн иһэр эдэр үлэһити нэһилиэк Сэбиэтин быыбарыгар бэйэтин колхуостаахтара 23-с нүөмэрдээх Балыыһатааҕы быыбардыыр уокурукка дьокутаатынан быыбардаабыттара.
Сэмэн ЖЕНДРИНСКЭЙ