Бүгүн, тохсунньу 22 күнүгэр, сарсыарда 8 чаас 45 мүнүүтэҕэ Чурапчы-Мэҥэ Хаҥалас кыраныыссатыгар Кыайыы былааҕын Уус Алдан улууһуттан тутар бэлиэ күммүт үүннэ. Былаах улууспутугар тохсунньу 22-23 күнүгэр диэри кытыастан баран салгыы Таатта улууһугар айанныаҕа.
Кыайыы былааҕа быйыл “Бары бииргэ — Кыайыыга” диэн девизтээх эстэпиэтэ өрөспүүбүлүкэбит бары улуустарын таарыйыаҕа, онтон ыам ыйыгар Дьокуускай куоракка эргийэн тиийиэҕэ. Кыайыы былааҕын Чурапчы-Мэҥэ Хаҥалас кыраныыссатыгар тоҕус Дьоруойдаах Уус Алдан улууһуттан анал байыаннай дьайыы кыттыылаахтара, “Хорсунун иһин” мэтээл хаһаайына, старшай сержант Роман Ноговицын уонна ЧВК “Вагнер” байыаһа, Бахмут куораты ылыы иһин, эр санаалаах буолуу хара кириэс уордьан кавалера Станислав Кириллин тутан киллэрдилэр. Кинилэр Знамяны улуустарын баһылыгар Василий Аммосовка туттардылар. Салгыы былааҕы “Чурапчы улууһа” МО баһылыга Степан Саргыдаев, бойобуой дьайыы бэтэрээннэрэ, полиция подполковнига Петр Сивцев, полиция старшай лейтенана Илья Слепцов уонна полиция саппааска капитана Василий Монастырев туттулар.
“Улуу Кыайыы өрөгөйдөөх 80 сылын көрсө үлэбит былырыыҥҥыттан саҕаламмыта. Бу биһиги дойдубут ытык күнэ бүгүҥҥү күҥҥэ өссө суолталанан турар. Ол курдук националистары утары дойдубут көмүскэлигэр билигин ыытылла турар анал байыаннай дьайыы Кыайыынан түмүктэнэрин туһугар уолаттарбыт хорсуннук кытта сылдьаллар. Онон Кыайыы Знамята өрөспүүбүлүкэ үрдүнэн айана “Бары бииргэ — Кыайыыга” диэн девизтээх ыытылла турара олус суолталаах. Бүгүн биһиги Уус Алдан улууһуттан туттубут. Бүгүн салгыы Алаҕар, Бахсы, Мугудай, Төлөй, Одьулуун, Хотпоҕо, Хадаар, Хайахсыт нэһилиэктэринэн сылдьыа. Сарсын 9 чаастан саҕалаан Арыылаах, Кытаанах, Сылаҥ, Чурапчы, Болугур, Соловьев, Болтоҥо, Хатылы нэһилиэктэрин таарыйыа. Тэрээһиннэргэ тыыл бэтэрээннэрэ, сэрии сылын оҕолоро, бойобуой дьайыылар кыттыылаахтара, оскуола үөрэнээччилэрэ кыттыыны ылыахтара. Биһиги бойобуой, дойдубутугар Кыайыыны уһансыбыт Кыһыл Знамяны өрө көтөҕүллэн, ураты суолта ууран туран көрсөбүт”, — диэн улуус баһылыга Степан Саргыдаев санаатын үллэһиннэ.
Кыайыы былааҕын бастакынан, Сталинград кыргыыһытын Дьоруойа, аатырбыт артиллерист Гавриил Протодьяконов биир дойдулаахтара, Алаҕар нэһилиэгэ олохтоохторо көрсүөхтэрэ.
Сэмэн ЖЕНДРИНСКЭЙ. Ааптар хаартыскаҕа түһэриитэ