Федора Самсоновна Седалищева салайааччылаах “Куоҕалы” ТОС быйыл даҕаны, муус ылыытыгар иннин кимиэхэ да биэрбэтэ. Биэс киһилээх хамаанда икки чаас иһигэр 21 ыалы мууһунан хааччыйда уонна эрэллээхтик бастакы миэстэ буолары ситистэ.
“Биллэн туран бэйэм ТОС-ум иһинэн түөлбэм салайааччыларыгар Николай Лукиҥҥа, Владислав Оконешниковка, Мария Луковцеваҕа дьону түмүүгэ итиэннэ бэйэлэрэ кэлэннэр үлэлээбиттэригэр сиртэн халлааҥҥа диэри улахан махталбын тириэрдэбин. Үс массыынанан быыһа суох мууһу тастылар. Ону таһынан махтаныам этэ хамаандам хамандыырыгар Дмитрий Портнягиҥҥа, Степан Макаров аатынан Чурапчы гимназиятын 11 кылааһын үөрэнээччитигэр Коля Посельскайга, Семен Новгородов аатынан Чурапчы орто оскуолатын 10 кылааһын үөрэнээччитигэр Ньургун Оконешниковка, итиэннэ Семен Филипповка уонна Владимир Андреевка. Уолаттар маладьыастаатылар, 21 ыал мууһунан хааччылынна”, — диэн Федора Самсоновна санаатын эттэ.
Күрэхтэһии уопсай боротокуолун иһитиннэрдэххэ үрүҥ көмүс мэтээли “Спортивнай” ТОС (сал. Яков Оконешников), боруонса мэтээли “Чараҥ” ТОС (сал. Ирина Кривошапкина) хамаандалара ылары ситистилэр.
Сэмэн Жендринскэй