Кулун тутар 29-30 күннэригэр, өрөспүүбүлүкэтээҕи көрбөттөр уопсастыбаларын тэрийиитинэн, илин эҥээр улуустарга бастакытын култуурунай-спортивнай, интеллектуальнай фестиваль Майа сэлиэнньэтигэр тэриллэн ааста.
Биэс улуус хамаандалара кэлэн, икки күн устата ыытыллыбыт араас күрэхтэргэ, куонкурустарга кииристилэр. Биһиги улууспут хамаандатын көрбөттөр уопсастыбаларын салайааччыта Василий Пономарев салайан илдьэ сырытта. Бастакы күҥҥэ култуура эйгэтигэр хастыы да түһүмэхтээх куонкурстар буоллулар. Хоптоҕо нэһилиэгиттэн үлэ бэтэрээнэ Н. М. Старостин ылбаҕай ырыатынан уонна П. Д. Дьячковская бэйэтэ суруйбут уус — уран дьүһүйүүлээх хомоҕой хоһоонунан ситиһиилээхтик кытыннылар. Вокал,фольклор куонкуруһугар Хатылыттан Гаврил Павлов, Чурапчыттан Фаина Торговкина кыттан көрөөччүлэр биһирэбиллэрин ыллылар.
Иккис күн спортивнай күрэххэ голболга Чурапчы хамаандата тэҥнээҕин булбата. Хапытаан Петр Елисеев (Чурапчы нэһ.), Гаврил Павлов (Хатылы), Роберт Пинигин (Одьулуун) чемпион үрдүк аатын сүктүлэр. Дартс быраҕыытыгар Чурапчы чиэһин Евдокия Протодьяконова( Сылаҥ), Фаина Торговкина (Чурапчы) көмүскээтилэр.
Күрэхтэһиилэр түмүктэринэн, бу сайын ыытыллыахтаах өрөспүүбүлүкэтээҕи фестивалга улуус аайыттан биирдии бастыҥ толоруулары сүүмэрдээн ыллылар. Биһигиттэн Гаврил Павлов, Парасковья Дьячковская кыттар чиэскэ тигистилэр. Бу улахан дьаһалга кыттарбытыгар өйөбүл, тирэх буолбут бары дьоммутугар истиҥник махтанабыт.
Былырыыҥҥыттан улуустааҕы көрбөттөр уопсастыбаларын салайааччытынан В.И. Пономарев талыллыаҕыттан сонун тэрээһиннэргэ дьону кытыннаран, үгүс үлэни-хамнаһы тэрийэн, улахан сэргэхсийии таҕыста. Быйыл бу бастакы тэриллибит фестиваль сыалын — соругун ситэн, инникитин кэҥээн иһэригэр баҕарабыт.
Иннокентий Матвеев.